Voluntariado

• Promover a integración do alumnado propio na realidade social e universitaria como parte fundamental da súa formación integral e complemento necesario dos seus coñecementos académicos.
• Fomentar a participación dos membros da comunidade universitaria en actividades voluntarias, que desexen encarreirar as súas inquedanzas sociais, cooperativas e solidarias.
• Difundir entre a comunidade universitaria información sobre as actividades de carácter social desenvoltas por ONG, institucións e fundacións, en especial as que desenvolven a súa actividade nas localidades nas que se atopan os campus da Universidade de Vigo.
• Propiciar e colaborar no desenvolvemento de estudos e traballos sobre temas relacionados co voluntariado e coa problemática social da contorna.

Se queres participar no voluntariado universitario tes que ser membro da comunidade e, en virtude da túa decisión persoal, libre e altruísta, participar en calquera proxecto mediante unha entidade de acción voluntaria.

Como alumnado tes dereito ao recoñecemento de créditos ECTS por compartir horas do teu tempo. Podes validar 30 horas de voluntariado por 1 crédito ECTS.

Que tes que facer?

• Tes que elixir o proxecto ou o programa no que queres incorporarte como voluntario/a.
• Poñerte en contacto coa entidade colaboradora ou co servizo ou coa área da Universidade de Vigo onde queres incorporarte para coñecer o horario, o lugar e todo o que necesites saber.
• Unha vez que tes clara a túa incorporación nunha acción de voluntariado, tes que inscribirte nun programa de voluntariado onde aparecen todos os proxectos en vigor, selecciona no que estás interesado e inscríbete.
• Cando o voluntariado se leve a cabo con menores é preciso que nos achegues un certificado negativo de delitos de natureza sexual. Na páxina do Ministerio de Xustiza explícache que é e como tramitalo.

Se tes calquera dúbida, podes porte en contacto co Servizo de Xestión da Extensión Universitaria por correo electrónico voluntariado@uvigo.gal.

Podes escoller un proxecto de voluntariado entre os que temos como propios ou con diversas entidades colaboradoras da contorna.

VER OS PROXECTOS

A Dirección Xeral de Xuventude, Participación e Voluntariado da Consellería de Política Social, en colaboración coas universidades da Coruña, de Santiago de Compostela e de Vigo, pretende favorecer a difusión da información xuvenil entre o alumnado dos campus universitarios a través do programa Correspondentes universitarias/os. 

• Información do programa
• Formulario de inscrición

As entidades sen ánimo de lucro, legalmente constituídas e dotadas de personalidade xurídica que desenvolvan programas ou proxectos de voluntariado no marco das áreas de interese xeral poderán beneficiarse de persoal voluntario, inscrito na Universidade de Vigo, mediante a súa adhesión para o desenvolvemento de actividades de interese xeral (servizos sociais, persoas con discapacidade física, psíquica ou sensorial, saúde, toxicomanías, medio ambiente, educación, cultura, ocio e tempo libre, consumo, defensa dos dereitos, infancia, xuventude, muller, persoas maiores, cooperación internacional e calquera outra que responda á natureza e fins da actuación do voluntariado).

Os servizos ou áreas da Universidade de Vigo tamén poderán beneficiarse do persoal voluntario, inscrito na Universidade de Vigo, mediante a súa adhesión para o desenvolvemento de actividades de interese xeral.

As entidades deberán asinar un convenio de colaboración e unha addenda onde se especifica o proxecto de voluntariado. Se desexan colaborar en varios proxectos ou programas, deberán asinar unha addenda por cada un deles.

• Convenio de colaboración para o desenvolvemento de programas de voluntariado
• Addenda-anexo ao convenio de colaboración para o desenvolvemento de programas de voluntariado

• Regulamento de voluntariado da UVigo
• Lei de acción voluntaria da Xunta de Galicia
• Lei estatal de voluntariado