Día Mundial da Saúde Sexual 2018
"A saúde sexual e os dereitos sexuais son fundamentais para o benestar"
O Día Mundial da Saúde Sexual (DMSS), impulsado pola Asociación Mundial para a Saúde Sexual, é unha celebración que, dende hai 40 anos, cada 4 de setembro promove unha maior conciencia social sobre a saúde sexual no mundo. A Universidade de Vigo, como institución académica de referencia e prestixio social, aposta pola promoción da saúde sexual entendida como un estado completo de benestar físico, emocional, mental e social en relación coa súa sexualidade. A sexualidade é un aspecto central do ser humano presente ao longo da súa vida e abrangue o sexo, as identidades e os papeis de xénero, a orientación sexual, o erotismo, o pracer, a intimidade e a reprodución (OMS, 2006). Cómpre ter en conta que para que se logre e se manteña a saúde sexual, os dereitos sexuais de todas as persoas deben ser respectados, protexidos e cumpridos. A Declaración de Dereitos Sexuais, fundamentados nos dereitos humanos universais, considera que os dereitos sexuais son:
1. O dereito á igualdade e á non-discriminación
2. O dereito á vida, liberdade e seguridade da persoa
3. O dereito á autonomía e á integridade do corpo
4. O dereito a unha vida libre de tortura, de trato ou pena crueis, inhumanos ou degradantes
5. O dereito a unha vida libre de todas as formas de violencia e de coerción
6. O dereito á privacidade
7. O dereito ao grao máximo alcanzable de saúde, incluíndo a saúde sexual que comprende experiencias sexuais pracenteiras, satisfactorias e seguras
8. O dereito a gozar dos adiantos científicos e dos seus beneficios
9. O dereito á información
10. O dereito á educación e o dereito á educación integral da sexualidade
11. O dereito a contraer, formar ou disolver o matrimonio e outras formas similares de relacións baseadas na equidade e no pleno e libre consentimento
12. O dereito a decidir ter fillos e fillas, o número e a diferenza de idade entre eles, e a ter acceso á información e os medios para logralo
13. O dereito á liberdade de pensamento, opinión e expresión
14. O dereito á libre asociación e á reunión pacíficas
15. O dereito a participar na vida pública e política
16. O dereito ao acceso á xustiza e á retribución e á indemnización