DUVI

Diario da Universidade de Vigo

O avance científico foi feito por investigadores das universidades de Vigo, Coimbra e A Coruña

Datado o baptisterio cristián máis antigo da península ibérica

Está localizado no xacemento portugués de Idanha-a-Velha

Tags
  • Estudantes
  • Medios
  • PAS
  • PDI
  • Público externo
  • Ourense
  • Cultura
  • Divulgación
  • Publicacións
  • Investigación
DUVI Ourense 19/09/2019

Un equipo de investigadores da universidades de Vigo, Coimbra e A Coruña veñen de datar o baptisterio cristián máis antigo da península ibérica, tal e como recolle un estudo publicado na revista Archaeological and Anthropological Sciences. Nel revélase a data de construción dos dous baptisterios paleocristiáns do xacemento de Idanha-a-Velha, en Portugal.

Segundo explican os responsables do estudo, baseándose en análises físico-químicas e arqueolóxicas foi posible situar a construción dunha das piscinas bautismais de Idanha-a-Velha na segunda metade do século IV, cando o territorio pertencía ao Imperio Romano. “Este baptisterio é, ata o momento, o máis antigo que se coñece na península ibérica, sendo un dos sinais máis antigos e importantes da presenza do cristianismo no territorio actual portugués”, explican Adolfo Fernández e Pedro Carvalho, dous dos autores do estudo e investigadores, respectivamente, da Facultade de Historia da Universidade de Vigo, e da Universidade de Coimbra.

Antecedente das pías bautismais

Construídos ao carón das primeiras igrexas, os baptisterios, indican os responsables do traballo, eran espazos onde se levaba a cabo o sacramento do bautismo por inmersión, antecedente das pías bautismais que xurdirán posteriormente na Idade Media, concretamente no século XI. Idanha-a-Velha, a antiga Egitania romana, engaden, foi sede episcopal durante o período suevo-visigodo, nos séculos V ao VII despois de Cristo, sendo un dos xacementos arqueolóxicos máis importantes de Portugal.

O estudo foi realizado no ámbito dun proxecto de investigación arqueolóxica levado a cabo en Idanha-a-Velha encabezado por investigadores das universidades de Coimbra e Nova de Lisboa coa colaboración de investigadores das universidades de Vigo e A Coruña, encadrándose nun protocolo entre as dúas universidades portuguesas, o Municipio de Idanha-a-Nova, no que se sitúa o achado, e a Direção Regional de Cultura do Centro.