DUVI

Diario da Universidade de Vigo

O venres celebraron o seu acto de graduación

Dúas novas promocións de Dereito e Historia rematan a súa formación no campus

Trátase dun total de 65 egresadas e egresados

Tags
  • Estudantes
  • Medios
  • PAS
  • PDI
  • Ourense
  • Estudantado
  • Estudantes
DUVI Ourense 10/06/2019

O campus de Ourense acolleu o venres o acto de graduación do alumnado de último curso das facultades de Dereito e Historia. 49 estudantes do primeiro centro e 16 do segundo celebraron, acompañados de familiares, amigos e membros da comunidade universitaria o remate dos seus estudos e o inicio dunha nova etapa profesional e persoal.

Graduación de Dereito

O acto de graduación de Dereito celebrouse no actos Marie Curie do edificio Politécnico, contando coa asistencia, entre outras autoridades, de Miguel Ángel Michinel, secretario xeral da Universidade de Vigo; Ernesto Pedrosa, presidente do Consello Social da Universidade de Vigo, e Marta Fernández, decana da Facultade de Dereito. “Chegou o momento de que a vosa formación integral reverta en beneficio da sociedade que confiou e investiu en vós”, díxolle ás e aos homenaxeados Marta Fernández. Nesta nova etapa, engadiu a decana, "as ferramentas adquiridas, ben conservadas e actualizadas cunha aprendizaxe permanente, e o voso esforzo persoal permitiranvos cultivar logros e éxitos profesionais e afrontar os retos que vos propoñades”. A VII promoción do Grao en Dereito, formada por 38 egresados e egresadas, e a I promoción do Programa Conxunto Grao en Administración e Dirección de Empresas-Grao en Dereito, formada por 11 persoas, foron apadriñadas polo profesor Roberto Bustillo e Marta Fernández. Durante o acto tamén se nomeou como membro honorífico do claustro de profesores da Facultade de Dereito a Blanca Vilà, catedrática de Dereito Internacional Privado da Universitat Autónoma de Barcelona.

Graduación de Historia

Polo que respecta á graduación de Historia, o acto tivo lugar na sala Emilia Pardo Bazán do Edificio de Ferro. A VI promoción do Grao en Xeografía e Historia, formada por 16 egresados e egresadas, foi apadriñada pola profesora Beatriz Vaquero e o catedrático Jesús de Juana. Ás e aos homenaxeados, Susana Reboreda, decana da Facultade de Historia, salientoulle como “a partir de agora tendes que decidir o seguinte paso, que sempre debe estar acompañado da continuidade da vosa formación. É evidente que este título non vos outorga todo o coñecemento na xeografía, na historia da arte e na historia, pero si que vos concedeu a posibilidade de saber onde buscar con rigor os coñecementos que precisedes”. Aos novos egresados e egresadas, a profesora recalcoulles como” “nunca esquezades o voso perfil humanista. Estou convencida de que esta sociedade precisa dos nosos coñecementos e que tendes capacidades para desenvolver neste ámbito moito máis alá do que imaxinades”.