Unha alumna de Educación Social, premiada no certame de prevención de adiccións Tu Punto de Mira

Cada curso académico, alumnado da materia Intervención Socioeducativas nas Condutas Aditivas, que imparten os profesores Manuel Isorna e José María Faílde en cuarto curso do grao de Educación Social do campus de Ourense, participa no certame de prevención de adiccións Tu Punto de Mira. Nesta edición, a alumna María Rodríguez acadou o terceiro premio na modalidade de Instagram. 

O concurso forma parte do programa Tu Punto, da asociación PDS-Promoción y Desarrollo Social, financiado pola Delegación del Gobierno para el Plan Nacional sobre Drogas (Ministerio de Sanidad) e que conta coa colaboración da Red Española de Universidades Promotoras de Salud, na que está a Universidade de Vigo. A iniciativa está orientada a informar e sensibilizar sobre os riscos asociados ao consumo de drogas e outras adiccións comportamentais, promover hábitos de vida saudables e a favorecer procesos de reflexión crítica sobre diferentes conductas aditivas. Nesta edición participaron 340 obras (217 vídeos de YouTube, 65 carteis de Instagram e 58 vídeos de TikTok) de 61 universidades españolas. 

Concretamente, María Rodríguez gañou o terceiro premio no 5º Concurso de Carteis de Instagram de Tu Punto, dotado con 200 euros. Fíxoo cun cartel titulado Tu mejor jugada es el bienestar e que ten como lema Cambia las reglas del juego y apuesta por una vida mejor. A temática elixida é o xogo e as apostas e na imaxe convídase ás persoas que teñen esta problemática a adoptar unha vida saudable apostando por outros hábitos de vida.