Alumnado de Educación Primaria deseña propostas de fomento da lingua galega entre escolares

Este cuadrimestre, alumnado do Grao de Educación Primaria da Facultade de Educación e Traballo Social do campus de Ourense levou a cabo o proxecto Educar na diversidade, transformar a sociedade. Nel traballaron arredor da comunicación en galego e do seu fomento, desenvolvendo diferentes actividades destinadas a escolares.  

A iniciativa foi unha das elixidas na convocatoria de proxectos de aprendizaxe-servizo 2024-2025 no marco da Axenda 2030 e dos seus ODS, da Universidade de Vigo. Estivo coordinada polas profesoras Ana María Iglesias e Mercedes González e foi realizada no marco das súas materias de segundo e terceiro curso Lingua galega e Lingua e literatura: galego. No proxecto participou o CEIP Mestre Vide, sendo as propostas deseñadas traballadas con nenas e nenos de quinto e sexto curso de Educación Primaria dese colexio. Foi, indican as profesoras responsables, “unha experiencia moi enriquecedora na que uns e outros puidemos compartir e aprender”. 

Da teoría á práctica

O desenvolvemento do proxecto tivo dúas fases. Na primeira, o alumnado universitario traballou nas aulas da facultade as pautas para unha boa comunicación efectiva en galego e deseñaron actividades de xogos, contacontos e dramatizacións teatrais. Nunha segunda fase, fixéronse varias sesións no CEIP Mestre Vide nas que se abordaron con nenas e nenos pautas de habilidades comunicativas e se levaron a cabo as actividades de fomento da lingua galega deseñadas, realizando diferentes dramatización de contos sobre temas de actualidade e interese para as nenas e nenos presentes. 

A actividade, explican as súas promotoras, contribuíu a que o alumnado universitario traballase diversas competencias, sobre todo as comunicativas arredor da lingua galega, coa elaboración de pautas para un bo manexo dela. Ademais, grazas á súa posta en práctica en dramatizacións, as futuras e futuros docentes puideron ser “consciente da importancia da transmisión da mensaxe efectiva para que teña unha recepción positiva e significativa por parte do receptor”. 

Na actualidade, indican as responsables da iniciativa, “debido ao incremento do emprego das tecnoloxías, compróbase a crecente perda das habilidades comunicativas, destrezas fundamentais tanto no ámbito persoal coma no profesional e a nivel de sociedade. Un bo coñecemento e emprego destas facultades permitiralle ao noso alumnado mellorar en moitos aspectos fundamentais”. A isto, desde a organización engaden entre os beneficios desta actividade “a riqueza que supón para o noso alumnado do Grao de Educación Primaria establecer unha conexión directa cos grupos de alumnos e alumnas de Educación Primaria do CEIP, conexión que lles outorga unha visión e experiencia de primeira man coa realidade da aula dos centros educativos”.