DUVI

Diario da Universidade de Vigo

Habilítase na Facultade de Dereito o primeiro baño adaptado para uso deste colectivo

O campus dá un paso cara a integración das persoas ostomizadas

Co obxectivo contribuír a mellorar a calidade de vida do alumnado e persoal con esta problemática

Tags
  • Entidades Colaboradoras
  • Estudantes
  • Medios
  • PAS
  • PDI
  • Público externo
  • Ourense
  • Saúde
  • Institucional
DUVI Ourense 05/11/2021

Cada día son máis as persoas ostomizadas, persoas que teñen un orificio no abdome por onde dan saída á urina e feces, que se recollen nunha bolsa adaptada ao seu corpo. A súa cifra en Ourense ascende a máis dun millar e en España a máis de 100.000, realizándose a nivel estatal cada ano arredor de 15.000 intervencións deste tipo. Co obxectivo de contribuír a facilitar a vida deste colectivo, moi condicionada polas consecuencias da ostomía, vén de habilitarse na Facultade de Dereito un cuarto de baño adaptado ás súas necesidades.      

Marta Fernández, decana da Facultade de Dereito, explica que a iniciativa xurdiu no marco da Comisión de Calidade deste centro e tendo en conta as demandas trasladadas pola Asociación de Crohn e Colite Ulcerosa de Ourense (ACCU Ourense). Con financiamento do Vicerreitorado de Planificación e Sostibilidade e o apoio da Vicerreitoría do Campus, apunta, conseguiuse finalmente crear este espazo este curso académico. “Con esta pequena axuda queremos contribuír a que as persoas ostomizadas poidan ter unha vida máis normal, mellorar a súa calidade de vida. Ademais, como comunidade universitaria permítenos sensibilizármonos cun problema que pode afectar a calquera de nós en calquera momento da vida”, apunta a decana. Pola súa banda, Esther de Blas, vicerreitora do campus de Ourense, recalca como esta iniciativa é unha mostra máis “da sensibilidade que hai no campus coa integración de todo tipos de colectivos”.

Fernando Jiménez, presidente de ACCU Ourense, salienta como a implantación deste servizo, ademais de “sensibilizar e dar visibilidade” á problemática deste colectivo, “permitirá que mocidade ostomizada poida vir a estudar á universidade coa tranquilidade, sabendo que teñen un baño adaptado para poder desenvolver o seu día a día, e sen o cal a integración é practicamente imposible”. Igualmente apunta a importancia desta medida de cara ás e aos traballadores, recalcando como “hoxe en día practicamente calquera persoa ostomizada ten que deixar de traballar”. O cambio, o baleirado e a limpeza da bolsa que portan as persoas ostomizadas, lembra Fernando Jiménez, nun aseo normal conleva moitísimas dificultades e un risco de infección importantísimo. O baño habilitado na Facultade de Dereito, que desde ACCU Ourense indican que é o único do que teñen constancia no ámbito universitario galego, foi deseñado cos elementos necesarios para facer este proceso o máis seguro e cómodo posible. Desde a entidade, tanto o seu presidente como Chari Álvarez, a súa traballadora social, destacan por último “a boa receptividade e o compromiso da Universidade de Vigo con esta problemática” desde a primeira reunión que tiveron coa Vicerreitoría de Responsabilidade Social, Internacionalización e Cooperación para trasladar á institución académica as súas necesidades.