As cómicas aventuras de dúas xubiladas centran unha webserie creada por estudantes da Facultade de Comunicación

“Maruja e Balbina, dúas inseparables xubiladas, quedan todos os días no banco de sempre para pasar o rato e dunha forma ou doutra sempre acaban metidas nunha aventura diferente”. Esta idea constitúe o punto de partida de Dúas Señoras, a webserie de humor realizada por 18 estudantes de Comunicación Audiovisual, no marco dun taller inserido no Curso de Medios Audiovisuais de Celanova (CeMAC). Coordinado polo profesor Paulino Pérez e dirixido a achegar o alumnado a unha contorna de traballo profesional, na que se dividen en diferentes departamentos e contan cun orzamento e un tempo de rodaxe limitado, o resultado final deste taller é unha serie protagonizada por Mercedes Castro e Ana Santos, que se estrea na tarde deste vernes, ás 18.00 horas, na Aula de Cine da Facultade de Comunicación. 

Dirixida por Uxía Soutullo e Luján Monteiro, con Alejandra Justo e Álvaro Cidre como produtores, Dúas Señoras conta é o resultado final da décimo terceira edición do taller Celanova, plató de ficción, que contou co patrocinio da Fundación Carlos Casares e da Axencia Galega das Industrias Culturais (Agadic), da Xunta de Galicia. A gravación levouse a cabo en outubro do pasado ano en Celanova e, unha vez completado o proceso de montaxe, este venres preséntase o resultado final, nunha sesión aberta a toda a cidadanía. Desde esta xornada ademais, os catro capítulos da serie poderán verse na rede.

Unha comedia construída con “situacións anecdóticas”

Como explica Pérez, nese obxectivo de achegar o alumnado aos procesos de traballo na industria, o taller promove cada ano o desenvolvemento dunha produción audiovisual, apostándose na última edición “polo formato da webserie, que non facíamos desde 2019”. O punto de partida, sinala, foron “situacións anecdóticas que lles poden pasar ás persoas maiores”, inspirándose “en historias das avoas e da familia dunha das directoras", a partir das que deron forma a unha comedia integrada por catro capítulos curtos, desenvolvida, “nun formato máis clásico, como se fora unha serie de televisión en pequeno formato”. Nese senso, o taller permitiu a este grupo de estudantes traballar “con dúas actrices recoñecidas”, cunha ampla traxectoria en series de televisión, como Mercedes Castro e Ana Santos.

O proxecto foi realizado por un grupo de 18 alumnos e alumnas do Grao en Comunicación Audiovisual, que integran Lóstrego Filmes, o proxecto de produtora que previamente deseñaran para unha materia da titulación. Dúas Señoras constitúe así mesmo o traballo de fin de grao (TFG), tanto da produtora Alejandra Justo, como de Uxía Soutullo, guionista, codirectora e autora da banda sonora da serie.