DUVI

Diario da Universidade de Vigo

Ofrecido no marco da programación de extensión universitaria do campus

Un curso afonda no desenvolvemento turístico do rural ourensán

Ao longo de sete sesións aborda esta temática desde o punto de vista teórico e práctico

Tags
  • Entidades Colaboradoras
  • Estudantes
  • Medios
  • PAS
  • PDI
  • Público externo
  • Ourense
  • Cultura
  • Cultura
DUVI Ourense 05/09/2022

Desde este luns e ata o 13 de setembro, a Facultade de Ciencias Empresariais e Turismo acolle a celebración do curso Ourense 2030: Desenvolvemento turístico rural. A iniciativa pecha a programación de extensión universitaria, os coñecidos como cursos de verán, do campus de Ourense deste ano, programación organizada pola súa vicerreitoría con financiamento da Deputación de Ourense.

Dirixido polo profesorado do centro Alberto Vaquero e Mª Montserrat Cruz, tamén decana da Facultade de Ciencias Empresariais e Turismo, o curso pretende ofrecer unha visión do futuro deste sector turístico abranguendo desde os seus xeodestinos, museos e paradores ata o papel do sector público para o seu desenvolvemento. A súa inauguración contou este luns coa participación, ademais dos responsables da formación, de Mónica Villanueva, directora da Área de Coordinación do Campus de Ourense, que destacou o interese desta actividade pola súa mestura de sesións de carácter máis teóricos con visitas a empresas; e de Carmen Sampayo, decana do Colexio de Economistas de Ourense, xa que o curso celébrase tamén no marco do convenio de colaboración existente entre esta entidade e a Facultade de Ciencias Empresariais e Turismo ourensá.

Potenciar as zonas rurais

O turismo, indican os responsable da actividade, configúrase como "un actor moi importante da cooperación ao desenvolvemento, especialmente en todo o que supón potenciar as zonas rurais e economicamente deprimidas, ao permitir iniciativas empresariais economicamente viables e, ao mesmo tempo, sostibles a medio e longo prazo". Ademais, engaden, o turismo ten “un importante papel a nivel local e rexional, o que permite unha mellora económica a nivel nacional, posibilitando un emprego de maior calidade e un crecemento económico inclusivo”.

Neste marco de traballo, o curso inaugurado este luns márcase como obxectivos dar a coñecer a importancia do turismo como motor de desenvolvemento no rural; ofrecer ás persoas asistentes “coñecementos teórico-prácticos, de tipo estratéxico, económico, financeiro e organizacional en materia de turismo rural” e achegarlles “ferramentas prácticas para o desenvolvemento dun proxecto de turismo rural”. Concretamente participan na formación 25 persoas “de perfil moi diverso e multidisciplinar”, abranguendo alumnado do Programa Universitario de Maiores, estudantes dos graos de Turismo e Administración e Dirección de Empresas do campus de Ourense e persoas alleas ao ámbito académico.

Segundo explicaron os seus promotores, o curso conta con setes sesións (catro en aula e tres de visitas) nas que se abordarán aspectos como o turismo como motor económico; o papel do sector público para o seu desenvolvemento; os recursos turísticos patrimoniais da provincia de Ourense desde o punto de vista dos museos; os paradores como motor turístico e os xeodestinos da provincia de Ourense. Tamén se falará do desenvolvemento do turismo por parte do Inorde (Instituto Ourensán de Desenvolvemento Económico); das enerxías renovables e xestión de residuos no rural; de Ourense como experiencia para o desenvolvemento do turismo rural e do atractivo do téxtil para este sector. Completarán esta programación visitas ao Grupo Cuevas; ao Centro de Desenvolvemento Agrogandeiro do Inorde en Xinzo de Limia e distintos enclaves de Verín e ao Balneario de Arnoia e Abadía Caldaria Hotel Rural.

Alberto Vaquero foi o encargado de arrancar este luns as intervencións coa conferencia O sector público no turismo rural. Nela fixo unha radiografía “da parte pública do turismo, de ata que punto o sector público ten un papel importante neste eido”. O turismo, lembrou o profesor da Facultade de Ciencias Empresariais e Turismo, “é fundamentalmente unha actividade privada pero ten que dalgunha forma ter un apoio público, sobre todo no eido da planificación”. Así, destacou a importancia de que “detrás do turismo rural tamén estea o sector público apoiando, financeiramente, con infraestruturas, con iniciativas, etc”.