O equipo de rugby consegue unha vitoria no seu primeiro partido de liga

O Campus Universitario Ourense Rugby Club arrancou este domingo a súa participación na liga 2020/2021 da división de honra B do rugby estatal e fíxoo acadando unha vitoria na casa fronte ao equipo navarro La Única RT, de Pamplona. Con este partido, despois de oito meses de parón debido ao impacto da covid-19, a competición de rugby volveu a Ourense. Foi, indican desde o equipo adestrado por David Monreal, un estreo “nunha mañá chuviosa fronte ao recentemente ascendido La Única RT, que non puxo nada fácil o partido”. “Despois de case oito meses sen xogar, notouse no campo. A pesar de non ter podido xogar amigables polas circunstancias do momento, o resultado dáse por satisfactorio. A ilusión e as gañas volveron e agardamos facer unha boa tempada aínda que sexa máis curta que as habituais”, sinalan desde o club ourensán. O resultado final do encontro entre o Campus Universitario Ourense Rugby Club e La Única RT foi de 25-20. A próxima xornada, os ourensáns desprazaranse a Vitoria para xogar con Gaztedi RT.