DUVI

Diario da Universidade de Vigo

A cita celebrouse na Facultade de Ciencias Empresariais e Turismo

Un foro aborda a situación do turismo rural en Galicia e os seus retos de futuro

Contou coa participación de representantes do sector e da universidade

Tags
  • Entidades Colaboradoras
  • Estudantes
  • Medios
  • PAS
  • PDI
  • Público externo
  • Ourense
  • Académica
DUVI Ourense 16/11/2022

A Facultade de Ciencias Empresariais e Turismo do campus de Ourense acolleu este martes pola tarde o Foro de Turismo Rural. Nel, Enric López, co-director do Observatorio do Turismo Rural en España, presentou datos de turismo rural en Galicia, e celebrarase unha mesa redonda sobre as necesidades, potencialidades e retos deste sector na comunidade autónoma na que participaron, ademais de Enric López, Cesáreo Pardal, presidente do Clúster de Turismo de Galicia; Francisco Almuíña, presidente da Federación Galega de Turismo Rural, e o investigador Fidel Martínez, da Universidade de Santiago de Compostela.

Ao acto asistiron Nava Castro, directora xeral de Turismo da Xunta; Mª Montserrat Cruz, decana da Facultade de Ciencias Empresariais e Turismo; José Antonio Fraíz, coordinador do foro e do mestrado en Turismo da Universidade de Vigo; Cesáreo Pardal, presidente do Clúster de Turismo de Galicia; e Emma González, xerenta do Inorde. Da cita, o seu responsable destaca o seu carácter dinámico e a oportunidade que ofreceu de interacción entre diferentes axentes do sector. Entre os temas abordados, sinala José Antonio Fraiz, estivo a conectividade, apuntando como “os escasos voos aos tres aeroportos galegos fronte ao de Porto fai que os turistas estranxeiros representen unha porcentaxe moi pequena do total de consumidores de turismo rural en Galicia”.

A profesionalización, con “só unha cuarta parte dos propietarios de establecementos de turismo rural dedicándose plenamente ao negocio” e a problemática da falta de relevo xeracional foron outros dos puntos abordados no foro. Igualmente tamén houbo tempo para achegarse a retos do sector como a súa estacionalidade, a súa baixa ocupación media e estancia media e os baixos prezos. “Hai que valorizar a oferta de turismo rural por medio da innovación, valéndose da contorna, da gastronomía, do patrimonio e das persoas. Outros destinos con menos recursos e os mesmos problemas sacan moita maior rendabilidade. En palabras de turoperadores aos que se lles mostraron experiencias do turismo rural galego: non somos conscientes do que temos”, sinala o coordinador do foro.