Diario da Universidade de Vigo
Será a estrea como sala de concertos da sede institucional no Berbés
A UVigo convida á cidadanía a celebrar o Día Europeo da Música cun concerto da Orquestra Clásica no edificio Redeiras
O martes 21 de xuño ás 20.00 horas con entrada de balde
A Universidade de Vigo celebrará o vindeiro martes o Día Europeo da Música 2022 cun concerto a cargo da Orquestra Clásica de Vigo no edificio Redeiras. Será unha actividade aberta ao conxunto da cidadanía e suporá a estrea da sede institucional da UVigo no Berbés como sala de concertos. “Este é a primeira actuación musical que imos celebrar alí e a idea é continuar con todo tipo de actividades culturais ao longo de todo o ano”, explica a vicerreitora en funcións de Captación de Alumnado, Estudantes e Extensión Universitaria Natalia Caparrini, quen explica que, neste caso, o concerto xorde ao abeiro dun convenio de colaboración que acaba de asinarse entre a UVigo e a Orquestra Clásica de Vigo.
O repertorio constará dunha serie de propostas de cámara na que destaca a do trío de vento composto polos músicos Celia Vallo Gil (frauta), Iria Pérez Salgueiro (fagot
O concerto, de arredor de 45 minutos de duración, arrancará ás 20.00 horas con entrada de balde ata completar a capacidade da sala. Nesta liña, desde a organización convidan a todas as persoas interesadas a achegarse e gozar dunha conmemoración, o Día Europeo da Música, coa que se busca compartir o amor por esta arte nunha xornada festiva aberta á cidade e na que non importan as etiquetas. “Queremos eliminar barreiras para que a cidadanía acceda e goce da escoita e práctica da música en directo”, salientaron desde a orquestra.