A UVigo participa nun proxecto europeo de reforma da carreira docente na educación superior en Ecuador

E-Talent (Ecuadorian tertiary educators transformation and learning enhancement) é o título dun novo proxecto europeo no que participa a Universidade de Vigo e que ten como obxectivo a transformación estrutural da carreira docente na educación superior en Ecuador. Con este reto, traballará na recualificación de máis de 400 docentes con competencias aliñadas coas demandas da economía de servizos e a transformación dixital; no establecemento de centros de formación de profesorado e no fomento da gobernanza universitaria, a transparencia e o bo goberno. 

Os socios desta iniciativa son o Instituto Politécnico do Porto (coordinador), a Red Enter (European Network for Teachers and Researchers), a Universidade de Vigo e 12 institucións ecuatorianas, entre elas numerosas universidades dese país e a Corporación Ecuatoriana para el Desarrollo de la Investigación y Academia (CEDIA). E-Talent está financiado polo programa Erasmus+ CBHE (Capacity Building in Higher Education) da Unión Europea con case un millón de euros, dos cales 90.000 corresponden á UVigo, e terá unha duración de 48 meses, abranguendo desde 2025 a 2029. 

A UVigo participa a través dun equipo multidisciplinar integrado por persoal docente e investigador tanto do campus de Ourense coma de Vigo. Do primeiro están membros do grupo HC1 (Historia Contemporánea 1), da Facultade de Educación e Traballo Social, do grupo Aeroespacial Technology Research Group e da Escola de Enxeñaría Aeronáutica e do Espazo. Do segundo están membros do grupo Antenas, Radar e Comunicacións Ópticas e da Escola de Enxeñaría de Telecomunicación. O equipo participante amosa a súa satisfacción por ser parte dunha “iniciativa internacional que busca transformar e fortalecer as capacidades do profesorado universitario no sector servizos dentro do sistema de educación superior de Ecuador”. A súa implicación neste proxecto, engaden, reafirma o compromiso da institución académica “coa cooperación internacional e a mellora da calidade da educación superior en América Latina”. 

Cinco eixes estratéxicos

O proxecto propón unha reforma estrutural da carreira docente no país, baseada en cinco eixos fundamentais, como son: o fortalecemento de centros de excelencia docente; a creación de traxectorias de desenvolvemento profesional con estándares internacionais; a promoción do recoñecemento social e profesional do educador; a implementación de centros de desenvolvemento profesional aliñados con estándares globais e o impulso a unha xestión universitaria máis transparente e orientada a resultados. E-Talent perfílase como unha iniciativa de longo alcance, “que non só pretende mellorar a calidade educativa, senón tamén fortalecer o rol do docente como actor central nos procesos de innovación e transformación institucional”.

A iniciativa prevé a capacitación de aproximadamente 400 docentes de Ecuador en metodoloxías innovadoras, competencias dixitais e desenvolvemento profesional, así como a formación de 100 expertos que conformarán un Comité de Seguimento encargado de realizar avaliacións entre pares. O proxecto tamén contempla o deseño de recomendacións nacionais para transformar as competencias docentes, aliñándoas cos estándares internacionais e as demandas do mercado laboral ecuatoriano, fortalecendo así o recoñecemento do profesorado non só polos seus logros científicos senón tamén  pola súa excelencia pedagóxica e a súa contribución ao sector servizos.

Un dos alicerces estratéxicos do proxecto é o paquete de traballo liderado pola Universidade de Vigo de Transparencia e Bo Goberno nas Institucións de Educación Superior Ecuatorianas. Nel traballarase en fomentar a adopción de prácticas de bo goberno, integridade e transparencia nas citadas institucións de educación superior e en desenvolver estándares marco para avaliar periodicamente as políticas de transparencia e goberno aberto. Tamén se centrará en crear un selo de excelencia en transparencia, que permita recoñecer e certificar ás institucións que destaquen polo seu cumprimento con devanditos estándares.

O proxecto xa está en marcha despois da súa xuntanza de lanzamento celebrada a finais de maio na entidade coordinadora, o Instituto Politécnico de Porto, e á que asistiron por parte da Universidade de Vigo María Isabel Doval e Marcos Arias. Durante o encontro establecéronse os comités técnicos, definíronse os obxectivos estratéxicos e coordináronse as primeiras accións conxuntas entre os membros do consorcio.