Virxilio Rodríguez recibe o premio Premio Xosé Neira Vilas de Novela Curta pola súa obra 'Off the record'

Virxilio Rodríguez, profesor de Dereito Penal da Universidade de Vigo, recibiu este mércores en Gres, Vila de Cruces, o VI Premio Xosé Neira Vilas de Novela Curta pola súa obra Off the record. O acto celebrouse coincidindo coa conmemoración o Día de Neira Vilas. O xurado destacou da novela “o acerto na recreación dunha trama investigadora que transcorre na Galicia bonaerense e que ten na desaparición dun personaxe de ascendencia sefardí a cerna da súa intriga”.

Fernando Redondo, presidente do padroado da Fundación Xosé Neira Vilas, foi o encargado de entregarlle o galardón a Virxilio Rodríguez. Sobre a concesión deste premio, o profesor da UVigo salientou antes da súa recollida que “foi unha sorpresa moi grande e unha grande alegría”. Lembrando como en anteriores edicións foi outorgado a escritoras e escritores moi recoñecidos, Virxilio Rodríguez subliñou que o Premio Xosé Neira Vilas leva o nome “dun escritor que penso que admiramos todos, pola súa obra e tamén pola súa dimensión persoal”. Deste xeito, apuntou, “quedar vinculado por medio da literatura a un xigante como Neira Vilas é unha honra inmensa”. O profesor tivo neste senso palabras de recoñecemento para o labor desempeñado pola Fundación Neira Vilas e para “a dedicación e xenerosidade das persoas que traballan nas convocatorias dos certames e concursos literarios en Galicia” pois, afirmou, “teñen un valor inmenso e son actores moi relevantes no fomento da creación literaria, da lectura, da dinamización cultural, etc”.

De Ourense a Bos Aires

O argumento da novela, explicou o seu autor, é unha investigación policial a partir dun corpo atopado no encoro de Cachamuíña, en Ourense. “O protagonista, un inspector de policía ao que non lle convence o informe forense que determina que se trata dunha morte natural, comeza unha pesquisa audaz, que o leva á cidade de Bos Aires. A partir deste momento comezamos un percorrido pola capital arxentina, seguindo os pasos do inspector”, adiantou Virxilio Rodríguez sobre a súa novela curta, que será publicada pola Fundación Xosé Neira Vilas. Nas páxinas da obra, detallou, “camiñamos polas rúas de Bos Aires, escoitamos a súa música, probamos os seus asados, visitamos as súas bibliotecas, os tribunais... sentimos o seu acento, os olores e sabores dunha cidade espectacular... e investigación dá ao inspector pistas que poden explicar o que el cre unha morte violenta... e ata aí podo ler”. Un elemento que ten especial importancia na trama é unha gravadora que sempre acompaña ao inspector e que permitirá coñecer os testemuños recollidos na investigación.

Da lectura á escritura

“Era a primeira vez que escribía novela, así que estou feliz de que gustase ao xurado”, comentou Virxilio Rodríguez. A súa incursión no mundo literario, indicou antes da recollida do galardón, vén da man dos seus pais e da súa irmá, “grandísimos lectores, sempre, e estudosos de lingua e literatura”. Do gusto pola lectura de cativo, sinalou, pasou a escribir e a presentarse a algúns certames e concursos literarios, destacando destes últimos como “é moi especial a idea de que outras persoas lean un texto que presentas de forma anónima e que poidan compartir contigo a emoción que ti mesmo sentiches cando estabas a construír ese mundo literario”.

A primeira vez que se presentou a un premio literario foi ao Concurso de Contos da Casa da Xuventude e da Agrupación de Libreiros de Ourense no ano 1994, onde lle concederon un accésit. Tamén foi distinguido nos Premios de Poesía, Relato Curto e Tradución da propia Universidade de Vigo, dos que destacou que teñen servido “para abrir as portas a escritores e escritoras hoxe tan importantes como Ledicia Costas ou Xurxo Martínez. “Obtiven un accésit en 1998, cando era un novo estudante universitario, e en 2011 gañeino cun relato titulado Espellos, un par de anos despois de rematar a miña tese de doutoramento”, lembrou. Igualmente recibiu un accésit nos premios de relato curto Modesto R. Figueiredo, entregados no ano 2020, cun relato titulado A primeira vista. A concesión agora do VI Premio Xosé Neira Vilas de Novela Curta, sinalou, “motívame a seguir escribindo e a pensar en novos proxectos”.