No marco da celebración na Universidade de Vigo do 11F, o Día Internacional da Muller e a Nena na Ciencia, a Unidade de Cultura Científica, en colaboración coa Unidade de Igualdade, organizan unha charla na que catro investigadoras de diferentes xeracións compartirán as súas experiencias como mulleres na ciencia. Participarán Ana Gil, investigadora predoutoral centrada nos efectos da exposición forestal no sistema nervioso autónomo; Andrea Mouriño, investigadora posdoutoral que estuda as narrativas de xénero na Prehistoria e a súa transferencia; Nieves Lorenzo, catedrática da Área de Física da Terra e actual directora da Escola de Enxeñaría Aeronáutica e do Espazo; e María Lameiras, catedrática na Área de Personalidade, Avaliación e Tratamentos Psicolóxicos no ámbito dos Estudos de Xénero e Sexualidade. Moderará o debate Yolanda Rodríguez, directora da Unidade de Igualdade da UVigo.