Ao abeiro dun convenio de colaboración, as universidades de Vigo, Santiago de Compostela e A Coruña, a Real Academia Galega de Belas Artes e os conservatorios superiores de música de Vigo e A Coruña promoven no Pazo de Mariñán, no municipio coruñés de Bergondo, a terceira edición do Encontro-residencia de Creadores Emerxentes Interaccións artísticas en Galicia. Entre o 28 de xuño e o 1 de xullo, estudantes vinculados a disciplinas como a arte, a arquitectura, a danza, a expresión corporal, a música ou a didáctica traballan conxuntamente no desenvolvemento de proxectos interdisciplinares no marco dunha residencia que abrangue tamén unha serie de conferencias e concertos.

Baixo o título de Teoría e práctica da luz: lóstrego, brétema, ártabro, a coordinación desta edición corre a cargo dos profesores da Facultade de Belas Artes Anne Heyvaert e Ignacio Barcia. Xunto ás actividades programadas para as e os participantes, inclúe tamén unha sesión de portas abertas, o xoves 31 ás 21.00 horas, dirixida a que o público poida coñecer as intervencións desenvolvidas polo alumnado.