O XIV Festival Internacional de Teatro de Ourense (Fito) arranca a súa programación no Teatro Principal de Ourense co espectáculo Katana, da compañía madrileña Viejas Promesas. A obra, que parte do coñecido como crime da katana, é, segundo indican os seus promotores, "unha reflexión sobre a maldade, sobre a fascinación e a obsesión por dotar de sentido aquilo que non o ten". Con esta representación iníciase unha nova edición do Fito, que se desenvolverá do 14 ao 24 de outubro na cidade das Burgas e, tal e como o fixera o pasado ano, tamén terá presenza no Concello de Barbadás. Serán en total nove espectáculos de temáticas e xéneros diversos nos que as compañías galegas terán un protagonismo destacado. A Universidade de Vigo é unha das entidades pratrocinadoras.