A Facultade de Ciencias Sociais e da Comunicación acolle entre o 16 e 18 de outubro o XII Congreso internacional da rede científica para o estudo dos fascismos, autoritarismos, totalitarismos e transicións á democracia (Refat), que reúne a expertos e expertas procedentes de universidades españolas, portuguesas, italianas e brasileiras. Organizado polo grupo de investigación en Propaganda e Técnicas de Comunicación, co apoio da Vicerreitoría do campus, Vicerreitoría de Comunicación e Relacións Institucionais e Consello Social da Universidade, o congreso leva por título Comunicación social e opinión pública nas ditaduras: narrativas, idearios e representacións e afondará no uso que os movementos totalitarios realizaron dos medios de comunicación e da propaganda.