Promovida polo grupo de investigación dx5 da Facultade de Belas Artes, no marco das actividades do XVI Congreso da Asociación de Estudios Japoneses en España, a sala de exposicións da Escola Superior de Conservación e Restauración de Bens Culturais de Galicia acolle a exposición Impresos. La imagen de Japón y el Japón de la imagen. 

A mostra, que poderá visitarse ata o 18 de outubro, inclúe unha selección de 25 gravados mokuhanga dos períodos Edo e Meiji, en diálogo coas obras de inspiración xaponesas de sete artistas contemporáneos. Concretamente, xunto a esta serie de pezas dos séculos XVIII e XIX preséntanse as creacións de Sabela Alonso, Miguel Cuba, Ángela Estévez, Carlos Fer, Anne Heyvaert, Santi Jiménez e Ana Soler.