No marco da programación do Salón Internacional do Libro Infantil e Xuvenil de Pontevedra, o Pazo da Cultura acolle o III Congreso Internacional de Mediación Lectora, que promoven o Concello de Pontevedra, a Vicerreitoría do campus, a Facultade de Ciencias da Educación e do Deporte, a rede de investigacíon Lijmi (Literaturas Infantiles del Marco Ibérico e Iberoamericano) e o Instituto de Ciencias da Educación da Universidade de Santiago de Compostela.

Coordinado pola profesora Eulalia Agrelo, e orientado a profesorado en exercicio, futuros docentes, técnicos de bibliotecas e outra serie de actores vinculados á selección de materiais de lectura para a infancia e a mocidade, a terceira edición do congreso terá o humor como eixo temático e contará cos relatorios de Jordi Sierra i Fabra, Ana Garralón, Esther Carrodeugas, o Hematocrítico, Gloria  Sánchez, Kiko Da Silva, Ledicia Costas ou Roger Olmos.

As inscricións, de balde, poderán realizarse a partir do 2 de marzo na web do Salón do Libro.