A sala de exposicións da Vicerreitoría do campus acolle a mostra Como o ves?, que presenta os resultados do taller impartido por tres estudantes da Facultade de Belas Artes no CEIP A Xunqueira I.

Promovida pola alumna Xulia Arias como traballo para unha materia do Grao en Belas Artes, a exposición reúne os 176 debuxos realizados polo estudantado deste colexio, nos talleres impartidos neste centro por Arias e as tamén estudantes da facultade Cristina Rus e Irene Santamaría. Neles, as e os escolares debían inspirarse ou reproducir unha obra destas tres artistas, presentes tamén nunha mostra que poderá visitarse ata o 24 de xaneiro.