Entre o 2 e o 4 de decembro a Vicerreitoría do campus acolle as IV Xornadas Internacionais José Saramago, promovidas pola Cátedra Internacional José Saramago (CJS) da Universidade de Vigo. Baixo o título de Saramago e os desafíos do noso tempo, as xornadas dirixidas a promover unha abordaxe multidisciplinar da obra e traxectoria do escritor portugués porán o foco no labor de Saramago como activista político, como defensor dos dereitos humanos, do ecoloxismo, da igualdade dos xéneros ou das culturas minorizadas. 

Na celebración destas xornadas, que contan co apoio e colaboración da Vicerreitoría do campus, inserirase ademais a constitución da Rede Internacional de Cátedras Galego-Lusófonas, impulsada pola CJS e que reunirá ás seis cátedras dedicadas ao escritor portugués existentes no mundo, xunto con outra serie de entidades.