20 persoas participan en Pontevedra nunha nova edición curso de español para inmigrantes 

Vinte persoas participan desde este luns no Centro Príncipe Felipe de Pontevedra na terceira edición no presente ano do curso de español para persoas inmigrantes que organiza a Deputación de Pontevedra e que imparten docentes do Centro de Linguas da Universidade de Vigo. Un dos propósitos centrais desta iniciativa, que busca facilitar a integración das persoas inmigrantes, é achegar a persoas de países non hispanofalantes a formación necesaria para que poidan obter o Diploma de Español Como Lingua Estranxeira (DELE A2), que constitúe un requisito indispensable de cara a obter a nacionalidade española. 

Impartido pola profesora do Centro de Linguas Lorena Rodríguez, que este luns acompañou á deputada provincial Olga M. García na apertura desta actividade, trátase dun curso de 40 horas, tras o que as e os participantes poderán presentarse ás probas para a obtención do DELE A2, que coordina tamén o propio Centro de Linguas, ao abeiro dun convenio co Instituto Cervantes. Dez persoas orixinarias do Brasil, cinco procedentes de Marrocos, catro do Senegal e unha de Alxeria forman parte da quinta edición dun curso, a terceira neste 2021, que a Deputación promove coa colaboración do Centro de Linguas e a Fundación Universidade de Vigo. Desde a súa posta en marcha en 2017, un total de 290 persoas participaron nuns cursos nos que tanto a formación como a matrícula para a realización das probas, que o pasado ano superaron o 80% dos participantes, son subvencionadas pola institución provincial.