Alumnado do campus aprende de xeito práctico as bases científicas da elaboración cervexa

Este cuadrimestre, na Facultade de Ciencias do campus de Ourense púxose en marcha un Grupo de Elaboración de Cervexa dende a Ciencia e a súa primeira actividade foi a realización dun obradoiro centrado na aprendizaxe práctica das bases científicas da preparación desta bebida. A iniciativa contou coa participación de alumnado dos graos do centro de Enxeñaría Agraria; Ciencia e Tecnoloxía dos Alimentos e Ciencias Ambientais. 

O proxecto estivo financiado polo Instituto de Agroecoloxía e Alimentación da UVigo, a citada Facultade de Ciencias e os grupos de investigación de Biorrefinería e Valorización de Biomasa (Bio2Val) e Investigacións Agrarias e Alimentarias (AA1). Estivo impulsado, coordinado e impartido por persoal investigador da Facultade de Ciencias e da Escola Superior de Enxeñaría Informática, concretamente por María García (grupo AA1); Fer Rebelo, Beatriz Rodríguez e Alexandre Rubira (grupo Bio2Val) e Rubén Veloso (Departamento de Enxeñaría de Sistemas e Automática). 

Aprendizaxe activa

A actividade desenvolveuse ao longo de varias sesións e varias semanas, abarcando todo o proceso, dende a preparación dos ingredientes e fermentación ata o deseño do etiquetado, o embotellado e a degustación final. A través desta experiencia, indican desde a súa organización, “o alumnado adquiriu coñecementos sobre procesos clave como o macerado, a fermentación, o uso de lúpulos ou o control de parámetros físico-químicos, sempre desde un enfoque científico e aplicado”. Así, detallan, o principal obxectivo deste proxecto foi fomentar a aprendizaxe activa mediante o uso dos recursos dispoñibles na planta piloto agroalimentaria que hai no edificio do Campus Auga, “unha contorna que permite ao estudantado traballar en condicións semellantes ás da industria alimentaria real”. 

Durante a sesión inicial de elaboración produciuse un mosto base para obter unha cervexa de estilo pale ale, á que se lle fixo un 'dry hopping' os tres últimos días da fermentación para obter unha bebida cunha alta complexidade aromática. Despois de todo o proceso, obtivéronse 57 litros de cervexa, cunha gradación aproximada do 5,5%. Ademais da elaboración técnica, o alumnado participou en todas as fases finais do produto, incluíndo o deseño do etiquetado, reforzando así competencias transversais relacionadas coa presentación, comunicación e valorización de produtos alimentarios.

Dada a excelente acollida da iniciativa, o grupo organizador sinala que a idea é consolidar esta experiencia interdicisciplinar o vindeiro curso académico. “Esta iniciativa nace con vocación de continuidade, coa previsión de realizar ata tres elaboracións por curso académico e incorporar actividades formativas complementarias que afonden nos aspectos científicos, tecnolóxicos e sensoriais do proceso cervexeiro”, sinalan por último.