Ana Pontón aborda os retos de futuro do campus de Ourense cos seus responsables académicos

Este mércores o vicerreitor do campus de Ourense, Francisco Javier Rodríguez Rajo, e responsables das diferentes facultades e escolas ourensás mantiveron un encontro con Ana Pontón, portavoz nacional do BNG. Nel abordaron diversos temas referidos á situación actual do campus universitario e aos seus retos de futuro, entre eles o financiamento universitario, as necesidades de novos espazos, o soterramento da avenida Otero Pedrayo e o avance das universidades privadas. Na reunión, tamén participaron por parte do Bloque Nacionalista Galego Luís Seara, portavoz municipal; Xosé Manuel Puga, concelleiro; Noa Presas, deputada pola comarca, e Daniel Castro, responsable parlamentario de Universidade.     

Tras o encontro, Francisco Javier Rodríguez destacou que foi “unha xuntanza moi positiva”, apuntando como nela se abordaron posibles “obras que son transformadoras non só para a cidade senón tamén para o campus”, como o posible soterramento da avenida Otero Pedrayo. O vicerreitor indicou que o encontro permitiu aos centros trasladar ao BNG as súas demandas, entre elas “moitas peticións para máis espazo para o campus”, porque lembrou, “coas novas titulacións que temos estamos moi xustos de espazos e servizos”. Neste senso, dixo que o obxectivo é “intentar que o campus teña os servizos que merece”. Igualmente, salientou que na xuntanza tamén se abordaron “os medos que temos respecto á universidade privada”, falando xa non só do campus de Ourense senón da universidade no seu conxunto. 

Pola súa banda, Ana Pontón comentou que o encontrou centrouse en “como impulsar o campus de Ourense e a ensinanza universitaria, que se nos parece estratéxica con carácter xeral parécenos que esa palabra cobra moito máis sentido cando falamos de Ourense”. Para Ourense, indicou, “o campus creo que é un activo desde o punto de vista da dinamización económica, social, cultural e na potencialidade que ten para ser un elemento que axude non só á cidade senón a toda esta parte do país”. Entre os puntos tratados na xuntanza citou o financiamento xa que, dixo, “o primeiro que necesita a universidade pública son máis recursos”. Neste senso Pontón lembrou que “desde o BNG estamos traballando para que ese financiamento sexa maior” e permita que “os chamados campus periféricos teñan máis posibilidades de desenvolvemento e polo tanto maior financiamento”. Así, indicou que o seu partido propón que o financiamento universitario sexa o 1,5% do PIB, cifra que, dixo, permitiría investir 1200 millóns nas universidades públicas e “que particularmente creo que daría oportunidades para que este campus poida medrar, tanto no número de titulacións que imparte como en todo o que ten que ver coa investigación”. 

Outros dos temas abordados, indicou Ana Pontón, foi “como nos preocupa o impacto que está tendo o desenvolvemento dunha universidade privada en Galicia, porque basicamente estamos vendo como se incumpre a lei e vanse duplicando titulacións que xa existen na pública, a pesar de que sabemos que iso en teoría estaba prohibido pola lei”, citando como exemplo o caso de Dereito e Enfermaría. “Vamos a seguir demandando que se cumpra a lei e non que se lle dean de certa maneira privilexios ás universidades privadas”, afirmou. Por último, tamén se tratou o proxecto de soterramento da avenida Otero Pedrayo e a unión das dúas zonas do campus de Ourense, proxecto que, dixo, “desde o BNG queremos impulsar se temos responsabilidades na alcaldía no próximo mandato”. Este proxecto, indicou, suporía “un cambio substancial no modelo de cidade e nas oportunidades que ten o propio campus”, afirmando que “vamos a apostar porque se leva adiante este soterramento que ten moitas vantaxes, como a conexión do campus coa cidade”.