Novas do DUVI

A Casa das Campás conmemora o centenario da interpretación do himno galego na Habana cunha mostra de Xurxo Lobato

• Pontevedra
• Cultura

Con motivo da celebración do centenario da primeira interpretación do himno galego na Habana o 20 de decembro de 1907, a Vicepresidencia da Xunta de Galicia levou ata a sede da Vicerreitoría do campus de Pontevedra unha exposición itinerante coordinada e producida polo recoñecido fotógrafo Xurxo Lobato. Baixo o título O himno. Os tempos son chegados, a mostra pretende achegar á cidadanía as orixes dos nosos símbolos de identidade, a bandeira e o himno, pero sempre vinculándoos á historia da cultura galega.

12/05/2008

O Concello de Pontevedra súmase á campaña informativa a favor do ensino plurilingüe

• Pontevedra
• Institucional

Trala entrada en vigor da nova normativa que regula o uso e a promoción la lingua galega no sistema educativo (decreto 124/2007), a Universidade de Vigo, en colaboración coas concellerías de Educación e Normalización Lingüística dos concellos de Ourense e Vigo, porá en marcha unha campaña informativa nas dúas cidades sobre as vantaxes do ensino plurilingüe á que, desde hoxe, tamén se suma a cidade de Pontevedra. Así quedou establecido na sinatura do convenio da que foron partícipes a concelleira de Normalización Lingüística, Anxos Riveiro, a concelleira de Educación, Margarita Castejón e o vicerreitor de Relacións Institucionais, Iván Area, quen cualificou o feito como “un elemento de colaboración moi importante que axuda a integración da institución académica na sociedade que a rodea”.

09/05/2008

A décima edición da Miteu baixa o pano no Principal tras unha semana de éxitos e complicidade co público

• Pontevedra
• Cultura

Co pesar dunha despedida pero cunha enorme satisfacción polos resultados acadados, a décima edición da Mostra Internacional de Teatro Universitario, baixa hoxe o pano no Teatro Principal logo dunha semana chea de éxitos e de complicidade co público. Así o avalía o encargado da organización, Salvador del Río, que afirma que “este ano a valoración é tremendamente positiva xa que obtivemos unha moi boa resposta por parte da cidadanía pontevedresa, que en varias ocasións superou o aforo do auditorio”. Ademais, Salvador del Río destacou o “alto nivel das propostas, nas que se podía apreciar unha gran capacidade de interpretación e de posta en escena”, subliñou o responsable da mostra.

09/05/2008

Arte e deseño fúndense na obra de Montse Rego, a convidada da sexta sesión de “Os Xoves de Moda”

• Pontevedra
• Académica

Tras unha semana de descanso, o ciclo que pretende achegar ás alumnas de Esdemga unha visión do panorama actual do deseño en España, Os Xoves de Moda, contou coa presenza de Montse Rego, recoñecida dentro e fóra do país polos seus traballos de transformación de obxectos cotiáns en xoias ou outros complementos. Dun xeito moi coloquial a creadora amosou aos asistentes esa faceta que a diferenza do resto dos artistas e que a vincula co mundo do deseño, facendo un percorrido desde os seus inicios ata a actualidade.

09/05/2008

O Lago Castiñeiras e as rúas do casco vello de Pontevedra acollen esta fin de semana o I Campionato Universitario de Orientación

• Pontevedra
• Deportes

Dentro dos proxectos da candidatura de Vigo á Universiada de 2013, o Servizo de Deportes trae esta fin de semana a Pontevedra o I Campionato de España Universitario de Orientación, unha iniciativa sen precedentes que “de algún xeito pon de manifesto a boa sintonía que existe entre a Universidade e as autoridades civís”, segundo sinala o vicerreitor do campus de Pontevedra, Jesús Hernández, no acto de presentación do evento. A proba, que acadará este ano unha gran expectación e relevancia por ser clasificatoria para o Campionato do Mundo Universitario que se celebrará en Tartu (Estonia) do 29 de xullo ao 2 de agosto, desenvolverase nas categorías de homes e damas e estará composta por tres probas: unha carreira de distancia media, outra de distancia longa e unha sprint.

08/05/2008

400 deportistas de todo o mundo afondan en Pontevedra nas novas tendencias da actividade física

• Pontevedra
• Deportes

Máis de 400 deportistas de todo o mundo participan desde hoxe en Pontevedra no II Congreso Internacional de Ciencias do Deporte e o IV Seminario Nacional de Nutrición, Medicina e Rendemento no Novo Deportista, un evento que pretende facilitar unha actualización e análise das novas tendencias da actividade física. Organizado polo concello, a Universidade de Vigo e o grupo de investigación HI10 do Departamento de Didácticas Especiais, a iniciativa “conta con participantes procedentes de diversas institucións educativas do país, ademais de docentes de Venezuela, Brasil, Italia e Francia”, segundo afirmou o director do comité organizador, Víctor Arufe, no acto inaugural que tivo lugar no Pazo da Cultura.

08/05/2008

Publicidade e RRPP e Comunicación Audiovisual apostan por estruturar os seus graos en tres bloques temáticos

• Pontevedra
• Académica

Dentro do proceso de reestruturación no que as universidades están somerxidas para poder adaptarse ao novo Espazo Europeo de Educación Superior, as titulacións relacionadas co eido das comunicacións propoñen un novo modelo dividido en tres grandes módulos nos que se aglutinarán os diferentes perfís profesionais que actualmente demanda o mercado laboral. Así o explicaron os catedráticos da Universidade Complutense de Madrid, Juan Benavides Delgado e Emilio C. García Fernández, este último membro da comisión encargada de elaborar o novo plan de estudo de Cominucación Audiovisual, nunha mesa redonda para afondar na situación na que se atopan as carreiras relacionadas con esta disciplina ante o reto europeo.

07/05/2008

O Teatro Principal ferveu coa representación da obra “A Ronda” de Artur Schnitzler

• Pontevedra
• Cultura

A décima edición da Mostra Internacional de Teatro Universitario en Pontevedra segue sumando éxitos trala representación da obra A Ronda de Artur Schnitzler que tivo lugar no Teatro Principal da cidade. Baixo a dirección de Quico Cadaval, a compañía da USC – Lugo conseguiu levantar a un público que por retrasos técnicos esperou algo máis do previsto a que comezara o espectáculo. Sen embargo a espera mereceu a pena e o auditorio ferveu coa actualización dunha obra que, segundo explica Cadaval, “foi no ano do seu estreo un provocativo escándalo ben calculado á procura dun suceso comercial e artístico, o que nos levou a escollela como material de traballo para a aula da USC”, afirmou o director na presentación da peza.

07/05/2008

Un documental elaborado por alumnas de Ciencias Sociais e da Comunicación colabora na integración social e laboral da etnia xitana

• Pontevedra
• Estudantes

Con motivo da presentación da campaña O emprego fainos a todos iguais, para fomentar a inserción laboral das persoas de etnia xitana, dúas alumnas de cuarto curso de Publicidade e Relacións Públicas amosaron un vídeo realizado por elas mesmas co obxectivo de dar unha visión próxima e en positivo desta cultura e da realidade que a conforma, deixando á marxe tópicos, estereotipos e prexuízos. Deste xeito e baixo o título Historias de vida, as estudantes Eva Pou Bueno e Julia Sánchez Álvarez achegaron o relato persoal de dúas mozas xitanas que intentan facerse un oco nun mundo laboral cheo de discriminacións e dificultades.

06/05/2008

Expertos internacionais daranse cita no campus nas “VIII Xornadas de Comunicación Corporativa e Protocolo”

• Pontevedra
• Académica

Expertos nacionais e internacionais da comunicación e das relacións públicas daranse cita no campus de Pontevedra nas VIII Xornadas de Comunicación Corporativa e Protocolo nas que, baixo a dirección do profesor Fernando Ramos, abordarase a importancia desta disciplina na imaxe das institucións e empresas. Os vindeiros 21 e 22 de maio será cando a Facultade de Ciencias Sociais e da Comunicación acolla as xornadas nas que, ademais, porase en marcha o I Foro Hispano-Luso-Iberoamericano relacionado con esta materia. Segundo explica o responsable da organización, “por primeira vez creamos este punto de encontro coa intención de que teña unha continuación no tempo xa que temos moi explorado o territorio nacional, co que levamos varios anos colaborando, pero a partir de agora a idea é darlle un enfoque cada vez máis amplo ás xornadas e contar coa participación de outros países", afirma Fernando Ramos.

06/05/2008

A décima edición da Miteu chega a Pontevedra con cinco representacións de teatro universitario galego e portugués

• Pontevedra
• Cultura

Tralo seu exitoso paso por Ourense e Vigo, a décima edición da Mostra Internacional de Teatro Universitario, chega a Pontevedra onde,desde hoxe e ata o vindeiro 9 de maio, os espectadores poderán deleitarse con cinco representacións, catro delas da man de aulas universitarias galegas e unha portuguesa.
84, A Ronda, Top Girls, Ubú Rei e Posso Avancar? Pergunta O Cavalo son as cinco obras que ocuparán o escenario do Teatro Principal todas as noites a partir das 20.30 horas.

05/05/2008

“O mundo da curta é especial e interesante pola súa capacidade de narrar a través da imaxe, algo que non teñen as longametraxes”

• Pontevedra
• Cultura

Coa mesma ilusión que o ano pasado pero cunha mellorada programación comezou a segunda edición de Gurtas.gz, as Xornadas da Curtametraxe Galega, que pretenden afondar no coñecemento do audiovisual galego e crear un punto de encontro entre profesionais. Acompañado polo vicerreitor do campus de Pontevedra, Jesús Hernández e polo decano da Facultade de Ciencias Sociais e da Comunicación, Alberto Pena, o responsable da iniciativa, Alberte Mera, subliñou que Curtas.gz quere ademais “dar un pulo á necesidade dun cinema propio na nosa comunidade e reivindicar o uso da nosa lingua, xa que en galego pódense contar moitas historias”, subliñou o representante dos CAF (Comités Abertos de Facultade).

05/05/2008

A 2ª edición de "Curtas.GZ" fará balance da actual situación do audiovisual galego

• Pontevedra
• Estudantes

Co obxectivo de achegar aos membros da comunidade universitaria a evolución do cinema en Galicia e máis concretamente das curtametraxes, os Comités Abertos de Facultades (CAF) están a preparar a segunda edición de Curtas.GZ, unhas xornadas que nesta ocasión centrarán os seus contidos nos anos 90 e na situación actual do audiovisual galego. Segundo comentou o responsable dos CAF en Pontevedra, Alberte Mera, “a nosa intención é a de servir de punto de encontro para o debate en torno á realización e consumo de curtas hoxe, promovendo a súa creación e difusión e, por suposto, en lingua galega”, subliñou o que é encargado da actividade.

30/04/2008

O ciclo "Fidelidade a unha obsesión” homenaxea ao cineasta ruso Andrei Tarkovski

• Pontevedra
• Cultura

Os amantes da gran pantalla teñen unha cita a vindeira semana na Casa das Campás coa inauguración do ciclo Fidelidade a unha obsesión, unha pequena homenaxe ao cineasta ruso Andrei Tarkovski que pretende achegar aos asistentes a complexidade da súa trama narrativa. Enmarcada dentro da programación de primavera da Vicerreitoría do campus, esta iniciativa ofrecerá cinco xornadas, do 5 ao 9 de maio, repletas de proxeccións e conferencias para afondar na obra e no estilo do autor, cinco días nos que se percorrerá a totalidade da súa filmografía da man de expertos como o profesor da Universidade Autónoma de Madrid, Miguel Angel Ramos, ou o crítico de arte e profesor na Facultade de Belas Artes da Universidade de Vigo, Alberto Ruíz de Samaniego.

30/04/2008

O programa “Memoria en Movemento” para mellorar a capacidade cognitiva maiores conta xa cun manual para a súa aplicación

• Pontevedra

Tras varios anos ao fronte do proxecto Estimulación Cognitiva a través da Motricidade (ECAM), a profesora da Facultade de Ciencias da Educación e do Deporte, Ana Rey Cao, presentou os resultados da primeira fase do traballo e a publicación Memoria en Movemento, un manual didáctico onde se recollen as actividades concretas que permiten mellorar a atención e a memoria dos maiores. Deste xeito cumpriuse un dos obxectivos xerais da súa investigación, que pretendía poñer en marcha un programa de intervención para persoas con indicios de deterioro cognitivo e que, segundo explicou Ana Rey, “trátase dunha ferramenta que se pode aplicar en calquera institución xa que está composta de varias prácticas distribuídas en diferentes tarefas”, explicou a autora.

30/04/2008