O Campionato Galego Universitario de Natación contou coa participación de arredor de 70 deportistas

Este martes arrancaron no campus de Ourense as probas da 27ª edición dos Campionatos Galegos Universitarios que esta semana se celebran en diferentes instalacións das tres universidades galegas e en Vilagarcía de Arousa, contando co patrocinio da Secretaria Xeral para o Deporte da Xunta de Galicia. Concretamente, a piscina universitaria ourensá acolleu a celebración do Campionato Galego Universitario de Natación, no que participaron arredor de 70 deportistas federados das tres universidades galegas. No cómputo xeral, a Universidade de Santiago de Compostela proclamouse gañadora da cita, con 207 puntos, seguida pola Universidade de Vigo, con 201 puntos, e pola Universidade da Coruña, con 148 puntos.

A cita estivo organizada pola Área de Benestar, Saúde e Deportes da Universidade de Vigo coa colaboración de Be One Ourense e seu obxectivo foi, alén da competición propiamente dita, recoñecer e pór en valor o esforzo do alumnado universitario que compaxina estudos e deporte de competición. Desde a súa organización destacaron o bo ambiente do campionato, que supón tamén para as delegacións das tres universidades asistentes compartir un día de convivencia. A participación nesta actividade permite ás e aos deportistas continuar adestrando cara próximas citas deportivas e ábrelles a porta para poder competir nos Campionatos de España de Natación Universitaria.

Entrega de premios

As probas comezaron a partir das 11.00 h na piscina universitaria do campus de Ourense, Be One As Lagoas, e o programa estivo composto polas distancias de 50 e 100 metros bolboreta, costas, braza e libre; 200 m libre; 100 estilos e as remudas mixtas de estilos e libre. A delegación da Universidade de Vigo, a máis numerosa con 27 deportistas, contou coa participación de deportistas como Mateo García, internacional con España en Augas Abertas, medallista nacional e plusmarquista galego; Eva Feijóo, velocista ourensá do grupo de adestramento no Centro de Tecnificación de Pontevedra; Sofía Carballo, plusmarquista galega en piscina olímpica en braza; e Naiara Eijo, Carla Faro e Antón Ares, con marcas mínimas para participar nos campionatos de España. Entre as e os representantes da Universidade de Santiago de Compostela estiveron nomes como Manuel Pérez, medallista nacional, e deportistas fixos nas citas nacionais como Odei Arias, Carmen Blanco e Alexia Camba. No que respecta á Universidade da Coruña hai que citar a participación de nadadores como Mario Maneiros e Javier Pontón e nadadoras como Julia Rodríguez.

O evento rematou cunha entrega de trofeos en 21 categorías, ademais das xerais, na que participaron Francisco Javier Rodríguez Rajo, vicerreitor do campus de Ourense; Manuel Pardo, delegado territorial en Ourense da Xunta de Galicia; Aníbal Pereira, tenente alcalde e concelleiro de Deportes; César Fernández, vicepresidente segundo da Deputación de Ourense, e Xabier Rial, director técnico da Área de Benestar, Saúde e Deporte da UVigo. Na súa intervención, o vicerreitor destacou a importancia do deporte e dos seus valores na formación do alumnado universitario e felicitou aos rapaces e rapazas participantes neste campionato polo esforzo que realizan no seu día a día de compaxinar a vida académica e deportiva e dar en cada competición o mellor de si mesmos.   

Nesta 27ª edición dos Campionatos Galegos Universitarios, na que participan arredor de 600 deportistas das tres universidades galegas, a Universidade de Vigo tamén será a encargada de organizar o xoves o campionato de vela nas instalacións do Centro Galego de Vela, en Vilagarcía de Arousa.