DUVI

Diario da Universidade de Vigo

Ata este venres poderán depositarse nos puntos habilitados nos diferentes centros

O campus acolle a primeira semana de recollida de aparellos electrónicos deste curso

Inserida no plan de acción do Green Campus, prevense dúas edicións máis

Etiquetas
  • Entidades Colaboradoras
  • Estudantes
  • Medios
  • PAS
  • PDI
  • Público externo
  • Pontevedra
  • Medio Ambiente
  • Institucional
DUVI Pontevedra 16/11/2020

Concienciar a comunidade universitaria da importancia que ten o correcto tratamento dos Residuos de Aparellos Eléctricos e Electrónicos é o propósito da Semana de recollida de RAEEs, unha iniciativa inserida nas accións do programa Green Campus que entre este luns e o venres 20 desenvolve a súa décimo terceira edición. Ao longo desta semana, as diferentes facultades e escolas do campus, o Pavillón Universitario, a sede da Vicerreitoría e a Escola Infantil contarán cun punto no que as e os integrantes da comunidade universitaria poderán depositar diferentes electrodomésticos e aparatos que funcionan con electricidade, pila e baterías, contribuíndo deste xeito tanto á reciclaxe daqueles compoñentes que poidan ter un novo uso como ao correcto tratamento destes residuos. 

“É importante ter en conta que moitos dos aparellos eléctricos ou electrónicos poden levar, aínda que sexa en pequenas cantidades, elementos perigosos para o medio ambiente, de difícil eliminación, polo que é moi importante que a xestión destes residuos sexa a adecuada”, salienta o director do Green Campus e Campus Crea, Carlos Souto. Promovida coa colaboración da Oficina de Medio Ambiente da Universidade, os RAEE recollidos ao longo desta semana serán trasladados a un xestor autorizado no tratamento destes residuos, agás aqueles compoñentes informáticos que “poidan ter unha segunda vida”, que serán entregados ao Grupo de Reciclaxe Informático da Universidade (Gruvi).

Tres edicións previstas para este curso

A Semana de recollida de RAEEs é unha iniciativa que cada curso forma parte dos plans de acción do programa Green Campus, prevéndose para o actual o desenvolvemento de dúas edicións máis. A anterior tivo lugar o pasado mes de marzo, coincidindo o seu remate, o venres 13, coa suspensión da actividade docente presencial nos campus por mor da covid-19 e o posterior decreto do estado de alarma, o que dificultou, como recoñece Souto, tanto a recollida como a cuantificación dos residuos depositados. Previamente, en novembro do pasado ano, a décimo primeira edición desta actividade permitiu reunir máis de 200 aparellos, que en conxunto constituían máis de 900 quilos de RAEEs.