Organizado por grupos das universidades de Vigo, Estadual de Londrina e Federal Fluminense
O campus acolle o VI Seminario internacional sobre democracia, cidadanía e estado de dereito
Nesta edición dedica especial atención á sostibilidade
O campus de Ourense acolle este luns, martes e mércores a celebración do VI Seminario Internacional sobre Democracia, Cidadanía e Estado de Dereito. A iniciativa é froito da cooperación académica entre grupos de investigación da Universidade de Vigo, a Universidade Estadual de Londrina, en Paraná, Brasil, e da Universidade Federal Fluminense, de Río de Janeiro, do mesmo país.
O evento ten como directores presidentes a Antón Lois Fernández e Guillermo Suárez (UVigo) e Gilvan Luiz Hansen (UFF) e como directores académicos a Clodomiro José Bannwart Júnior e Elve Miguel Cenci (UEL) e Eder Fernandes Monica. Na súa organización está o Instituto Gilvan Hansen e conta co patrocinio da Xunta de Galicia, o Consello Social da UVigo, o Campus Auga e Lauro Rabha Advogados. Os obxectivos do seminario son “discutir as cuestións máis importantes sobre a democracia e a xestión das institucións desde a perspectiva de construír xustiza social e sostibilidade” e promover o diálogo interinstitucional, compartindo experiencias específicas para cada institución sobre o tema do evento. A iniciativa tamén quere analizar os retos que presenta ao dereito as crises contextuais e a construción da sostibilidade con respecto á cidadanía e á democracia e “permitir a construción e consolidación de redes de relación e investigación que se converten en asociacións académicas intercontinentais prometedoras”.
O V Seminario Internacional sobre Democracia, Cidadanía e Estado de Dereito centra a súa atención sobre as cuestións e os desafíos ás que se enfrontan as ciencias humanas e sociais, especialmente o dereito, na busca de perspectivas de sostibilidade e desenvolvemento con calidade de vida e igualdade. Faino, ademais, “nun escenario global marcado polas constantes inestabilidades derivadas de crises institucionais, que ten o crecemento dos movementos totalitarios a nivel mundial como síntoma de exclusión e ameaza para a humanidade, xerando impactos globais na xestión de institucións (gobernos, empresas, familias, etc.)”. Ademais, engaden desde a organización do evento, a pandemia de covid-19 aínda eixa as súas consecuencias en diferentes países do mundo e “provocou un empeoramento da desigualdade entre as persoas e entre as nacións, xa sexa no acceso á información, á alimentación, á vivenda, á saúde e ás condicións mínimas para a vida con dignidade”. A busca da integración e expansión do diálogo sobre os problemas contemporáneos e a discusión das posibles solucións a eles, indican desde o seminario, “son motivos que nos permiten a realización deste evento”.
Formato mixto
En formato mixto, presencial e virtual, as sesións desenvólvese no edificio Xurídico-Empresarial tras a súa inauguración este luns nun acto que contou coa participación de Francisco Javier Rodríguez, vicerreitor do campus de Ourense; Susana Álvarez, decana da Facultade de Dereito; Fernanda Pontes Pimentel, decada da Facultade de Dereito da Universidade Federal Fluminense (Brasil); Gilvan Luiz Hansen, director do evento e catedrático da UFF; Rosendo Fernández, presidente do Inorde Ourense; Clodomiro José Bannwart, director do Programa de Doutoramento en Dereito Negocial da Universidade Estadual de Londrina, e Roberto Ignacio Fernández, director do Campus Auga.
A conferencia inaugural centrouse nas fontes xurídicas on-line do Dereito Romano e as súas contribucións contemporáneas, a cargo das profesoras María del Carmen López e María José Azaustre, da Universidad de Oviedo. Con elas abriuse un amplo programa que inclúe a presentación de paneis e o desenvolvemento de sesións temáticas que teñen como eixes cuestións como o dereito, tecnoloxía e desafíos ao desenvolvemento sostible; os dereitos humanos, regulación, inclusión social e sostibilidade hídrica; a sostibilidade en relacións familiares, de afecto e coidado; as relacións internacionais, conflitos e desenvolvemento sostible, e a sostibilidade en relacións laborais, empresariais e económicas. A conferencia de clausura leva por título Da infradenuncia á infradetección dos delitos de odio cometidos sobre persoas e grupos en situación de vulnerabilidade, de Adán Carrizo, da Universidad de Salamanca. Por último, o evento pecharase cunha homenaxe ao catedrático emérito xa xubilado da UVigo Luís Rodríguez Ennes.