O campus conta xa coa súa propia porta ao Lérez

Co obxectivo en primeiro termo de dar servizo ás materias relacionadas con deportes náuticos que se imparten na Facultade de Ciencias da Educación e do Deporte, pero co propósito tamén de que se converta nunha instalación para o conxunto da cidadanía, a Vicerreitoría do campus acometeu a comezos de ano as obras de instalación dun embarcadoiro na marxe norte do río Lérez. Mais esta actuación completouse poucos días antes de que se decretase o estado de alarma o que, sumado á suspensión da actividade docente presencial, impediu que o embarcadoiro se puxese en funcionamento ata comezos do presente curso. Foi tamén nestas semanas cando a este equipamento se lle sumou a instalación, a carón de Ciencias da Educación e do Deporte, dun pañol para gardar embarcacións.

“Dentro do noso vínculo co río e con toda a contorna da Xunqueira, queremos recuperar estes espazos para o campus e desde o campus, pero pensando tamén na cidadanía”, salientou o vicerreitor do campus, Jorge Soto, tras unha visita a esta instalación. Actualmente, o uso do embarcadoiro está limitado “ás materias vinculadas co deporte e as actividades acuáticas” do grao en Ciencias da Actividade Física e do Deporte, engade o director da Área de Infraestruturas do campus, José María Cancela. Non obstante, co obxectivo de, “no futuro, poder dar un servizo tamén á cidadanía de Pontevedra”, trabállase actualmente na creación dos “protocolos de actuación” que fagan posible ampliar os usos desta instalación, a través de iniciativas como o impulso dunha escola de ocio e tempo libre no campus, “na que poderían facerse actividades náuticas”, engade Soto. 

Socorrismo e deportes náuticos

A obra, que comprendeu a limpeza do fondo do río nesa zona e a colocación dunhas “pequenas lousas de cimentación”, previas á instalación do embarcadoiro, levouse a cabo, como explica Cancela, co obxectivo de “dar un servizo á Facultade de Ciencias da Educación e do Deporte e, en xeral, ao campus de Pontevedra”. De feito, está a ser utilizado xa para a materia sobre salvamento e socorrismo que incorporou no presente curso esta titulación, uso ao que se sumará posteriormente, explica Cancela, o da materia sobre deportes náuticos. 

Neste caso en concreto, a esta actuación viuse complementada pola instalación, nas últimas semanas, dun pañol como “segunda zona para almacenar determinadas embarcacións que se empregan para a materia de remo e piragüismo” e que se suma á xa existente a carón do Pavillón Universitario. A idea “é que esta segunda zona de almacenamento permítanos reducir o máximo o traslado de embarcacións cruzando viais por parte do alumnado”, sinala Cancela, que incide por outra banda en que estes dous equipamentos contribúen tamén a “potenciar a marxe dereita do río como un espazo de esparexemento da cidade e do campus”. Ademais, engade, o emprazamento do embarcadoiro fronte a praia fluvial, fai que esta instalación “poida tamén resultar de utilidade nalgún momento de producirse unha emerxencia”.