Enxeñaría Aeronáutica pon en valor as traxectorias profesionais que están tendo as súas primeiras promocións

A Escola de Enxeñaría Aeronáutica e do Espazo do campus de Ourense celebrou este venres o seu III Foro Alumni. Nel, egresadas e egresados do centro volveron a el para contarlle ao seu actual alumnado como está sendo as súas traxectorias profesionais. A actividade estivo organizada con motivo do 12 de abril, Día Internacional dos Voos Espaciais Tripulados, destacando a directora do centro, Nieves Lorenzo, a pertinencia desta celebración tendo en conta o lanzamento estes días da misión á Lúa Artemis II. 

O acto arrancou dándose a coñecer a resolución do concurso fotográfico da Escola de Enxeñaría Aeronáutica e do Espazo Aerovisión 2026. Nel convidábase ás persoas interesadas a presentar as súas mellores imaxes no ámbito aeronáutico e/ou espacial. En total presentouse unha vintena de obras, concedéndose tres galardóns. O primeiro premio, dotado cun dron, foi para o fotoxornalista Iñaki Abella, pola fotografía Línea de fuego. O segundo, dotado cun telescopio, recaeu en José Luis Neira, pola imaxe La Patrulla Águila. Por último, concedeuse un terceiro premio, dotado cuns prismáticos, a Nicolás Outón, pola peza Air Canada Vortex. 

Tras a entrega dos galardóns, arrancou o programa do foro. Cinco foron os testemuños recollidos nel: Enrique Aldao, do grupo Aerolab da UVigo; Sara Rodríguez, de Alén Space; Marco Casanova, da Axencia Espacial Europea; Belén Ayude, de Airbus Defence and Space, e Marcos Burgo, de Convergent Science. 

Cinco traxectorias diversas

Tal e como puido coñecer o alumnado presente no foro, Marco Casanova é un enxeñeiro aeroespacial da primeira promoción do Grao en Enxeñaría Aeroespacial da UVigo (2016-2020) especializado en operacións espaciais e astrodinámica. Tras completar un mestrado en Enxeñaría Espacial na Universidad Carlos III de Madrid, incorporouse ao Centro Europeo de Operacións Espaciais da Axencia Espacial Europea, onde ten traballado no deseño, preparación e execución de operacións de diversas misións da axencia, desde misións astronómicas como Gaia ata misións de observación terrestre como EarthCARE, BIOMASS ou recentemente o compoñente español da constelación Atlántica. En paralelo a esta actividade profesional está a realizar o seu doutoramento na Universidade de Vigo, centrando a súa investigación en astrodinámica, con especial interese na optimización de traxectorias interplanetarias. 

Tamén da primeira promoción da Escola de Enxeñaría Aeronáutica e do Espazo falou Sara Rodríguez, que deu seu salto profesional en plena pandemia, no 2021, para traballar no Centro de Control de Satélites Xeoestacionarios en EUMETSAT. Tras dous anos de experiencia e a participación no lanzamento de MTG-I1, mudouse a Toulouse para traballar do lado da industria en Desenvolvemento de Operacións Satelitais para MetOp-SG, operado tamén por EUMETSAT. Con ganas de tocar a parte de proxectos mudou a traballar en Operacións e Desenvolvemento de Proxectos de EGNOS. Tras tres anos en Francia, dende outubro 2025 é responsable de Operacións Satelitais en Alén Space, liderando un equipo de cinco persoas e encargándome de todas as operacións satelitais da empresa. 

Completando a representación desta primeira promoción estivo Enrique Aldao. El realizou o mestrado en Enxeñaría Aeronáutica na Universidad Carlos III de Madrid e doutorouse en Tecnoloxía Aeroespacial pola Universidade de Vigo, sendo actualmente investigador posdoutoral no grupo Aerolab do Instituto de Física, Computación e Ciencia Aeroespacial (Ifcae) da Universidade de Vigo. Nel participa en distintos proxectos internacionais de investigación. Polo seu labor como investigador ten recibido xa varios recoñecementos, como o Premio Espazo 2024 (Enaire), e ten participado en diversas estancias internacionais (INESC TEC, ISAE-SUPAERO, Delft University of Technology).

Xa da segunda promoción (2017-2021) da Escola de Enxeñaría Aeronáutica e do Espazo participou Belén Ayude, especializada en aeronaves e cunha traxectoria centrada no deseño e desenvolvemento de estruturas aeronáuticas. Iniciou a súa carreira profesional en Capgemini Engineering, onde estivo un ano e adquiriu experiencia en deseño con ferramentas CAD e documentación técnica. Actualmente traballa como deseñadora de estruturas en Airbus Defence and Space, participando en proxectos internacionais dentro do sector como Eurodrone ou Eurofighter. Na súa traxectoria destaca tamén a colaboración na creación de pezas para o avión comercial máis vendido do mundo, o A320, ou o recentemente A321XLR.

Por último e xa terceira promoción (2018-2022), o foro contou coa participación de Marcos Burgo. Actualmente traballa como enxeñeiro de soporte para Convergent Science en Linz, en Austria, onde se encarga de levar a cabo simulacións de motores de combustión interna. No seu camiño ata aí, realizou un mestrado en Mecánica de Fluídos Computacional na Universidad Politécnica de Valencia e traballou no seu CMT–Clean Mobility & Thermofluids (UPV) modelando a combustión de hidróxeno.