Unha exposición percorre en Belas Artes os 20 anos de historia da Asociación Galega de Profesionais da IlustraciónUnha exposición percorre en Belas Artes os 20 anos de historia da Asociación Galega de Profesionais da Ilustración

Belas Artes centra este venres a actividade do 22 Encontro Galego de Ilustración, que desde o pasado luns se desenvolve en diferentes puntos de Pontevedra e que a Asociación Galega de Profesionais da Ilustración (AGPI) presenta como un “espazo de aprendizaxe, inspiración e celebración” que reúne anualmente profesionais, estudantes e afeccionados á ilustración. No marco desta programación, a sala O Abrigo acolle deste este venres a exposición coa que AGPI rememora as súas dúas décadas de traxectoria, reunindo ás creacións de 63 autores e autoras membros desta asociación. 

A mostra XX anos de AGPI poderá visitarse ata o 24 de outubro e reúne un conxunto de obras de ilustradores e ilustradoras de diferentes xeracións, desde Siro ou Manel Cráneo, ata novos autores e autoras, varios deles egresados da facultade pontevedresa. Desenvolvida para a anterior edición deste encontro, celebrada en Lugo, desde a asociación presentan esta exposición como “un exemplo e celebración grupal da calidade e heteroxeneidade, non só da asociación senón tamén de ilustración en Galicia, xerando así un diálogo entre as diferentes xeracións de profesionais do sector”, segundo sinala a presidenta de AGPI, Laura Romero, no seu texto de presentación. Nel sinala tamén que, con frecuencia, asóciase a profesión de ilustrador ou ilustradora a un “medio de vida cheo de cor, creatividade e diversións”, recoñecendo que “a ilustración vai a miúdo da man destes conceptos tan positivos”, mais tamén que trae consigo outros “como precariedade e illamento”. Romero participa esta tarde, xunto ao vicedecano de Cultura, Ignacio Pérez-Jofre, na inauguración desta exposición, completada cunha actuación de Zeltia Irevire. 

Previamente, Belas Artes acolle tamén este venres outras dúas actividades inseridas neste Encontro Galego de Ilustración. En primeiro termo, o faladoiro Estudié ilustración ¿Y ahora qué?, a cargo da escritora e ilustradora Ío Bru. Fundadora de Ilustrando Dudas, unha plataforma virtual dedicada a dar información, formación e asesoramento e ilustradoras, esta profesional responsabilízase tamén dunha sesión de revisión de portfolios.  

Novo curso no Abrigo

Creada en 2023 no espazo que ocupaba a antiga cafetaría da facultade, despois de que as convocatorias para a adxudicación deste servizo quedasen desertas, O Abrigo inicia nestas semanas a súa programación deste curso 2025/2026, na que estará coordinada polo colectivo Luscofusco, integrado polos estudantes Pablo Martínez, Dana Latorraca, Andrea Barreiro e Neithan González, xunto co Vicedecanato de Cultura. Esta mostra de AGPI constitúe de feito a segunda iniciativa impulsada no presente curso neste espazo, que previamente acolleu, entre o 1 o 8 de outubro, a mostra The First Pit Stop for artists, unha pequena mostra “de memorias e arquivos de traballos de fin de grao”, que se presentaban tanto nun formato físico como dixital.