Os recoñecementos a María Mayán e Iria González fan brillar á UVigo nos Premios Fundación Barrié-RAGC

Este mércores foi un día de celebración da excelencia na Universidade de Vigo. Fíxose pola mañá na celebración de San Tomé de Aquino e continuou pola tarde no compostelán Pazo de San Roque coa entrega dos Premios de investigación Fundación Barrié-RAGC, unha gala na que se entregan os premios ás mellores investigacións feitas en Galicia e que, nesta ocasión, trouxo para a UVigo o Premio en Ciencias Básicas para un proxecto liderado  desde o CINBIO por María Mayán no que se busca unha nova diana terapéutica contra o cancro, e o Premio á mellor investigación en Ciencias Sociais para un estudo dirixido a reducir o impacto ambiental do comercio electrónico,  realizado pola investigadora da Escola de Enxeñería Industrial, Iria González.

Na busca de novas opcións terapéuticas contra o cancro

O proxecto liderado desde o CINBIO por María Mayán, responsable do grupo de investigación Cellcom, Comunicación celular en cancro e en enfermidades asociadas á idade, céntrase na identificación dunha proteína como unha potente diana terapéutica para loitar contra un tipo de mutación xenética presente en cancros como o melanoma, o de mama ou o colorrectal. Amósase capaz de frear o crecemento de certos tumores e evitar a aparición de resistencia aos fármacos. “A resistencia ao tratamento é un dos retos máis importantes en oncoloxía, por iso proxectos encamiñados a entender os mecanismos implicados e a buscar solucións son tan relevantes para poder chegar a curar o cancro ou, polo menos, cronificalo”, salientou a investigadora, ao tempo que resaltou que “esta investigación exemplifica o potencial transformador da ciencia feita en Galicia para abordar problemas reais”.

Aposta pola sostibilidade no comercio electrónico

O premio en Ciencias Sociais foi para Iria González, da Escola de Enxeñería Industrial, que traballa na xestión sostible da denominada última milla no comercio electrónico. É a fase final e máis crítica do proceso, o transporte do pedido desde o derradeiro centro de distribución ata a entrega ao cliente, cun alto impacto ambiental. A investigación proporciona ferramentas e directrices para facilitar o deseño e posta en marcha de estratexias sustentables neste último tramo do proceso. “Para nós este premio é un recoñecemento á aposta pola sostibilidade e un impulso para seguir a traballar nesta liña” -sinalou a investigadora-.

“A ciencia non avanza a base de xestos espectaculares”

A entrega de premios contou coa asistencia do presidente da RAGC, Juan Lema, e o resto do equipo de goberno da institución, xunto a outras académicas e académicos. Acompañáronos diversas autoridades como o conselleiro de Educación, Ciencia,  Universidades e Formación Profesional, Román Rodríguez; o subdelegado do Goberno na Coruña, Julio Abalde; a presidenta da Fundación Barrié, Pilar Romero; o reitor da Universidade de Santiago, Antonio López; a vicerreitora do Campus de Ferrol e Responsabilidade Social da Universidade da Coruña, Ana Isabel Ares; a presidenta do Consello da Cultura Galega, Rosario Álvarez; entre outros representantes de institucións políticas, culturais, científicas e académicas galegas.  

Juan Lema reafirmou na súa intervención “o papel da ciencia como elemento central do progreso da nosa sociedade, como motor de desenvolvemento social, económico e cultural”. E puxo de relevo que “a ciencia non avanza a base de xestos espectaculares, senón grazas a un labor constante, rigoroso e moitas veces silencioso”. Manifestou, así mesmo, que “a RAGC forma parte dese esforzo colectivo por construír un futuro mellor baseado no coñecemento, no pensamento crítico e no compromiso co ben común, capaz de responder aos retos do presente. As múltiples distincións e recoñecementos recibidos polas nosas académicas e académicos son motivo de orgullo colectivo, pero tamén unha proba clara da solidez e do nivel da ciencia que se fai en Galicia”.

Recoñecementos en distintas categorías

Na categoría de Ciencias Técnicas premiouse o traballo do grupo de Cristina Gallego, do Centro de Investigación Interdisciplinar en Tecnoloxías Ambientais -Cretus- da Universidade de Santiago de Compostela. Neste caso, propoñen un xeito innovador e sustentable de aproveitar a pel do peixe, empregándoa para obter xelatina de alta calidade para o os sectores alimentario, farmacéutico e cosmético. “Este recoñecemento é unha demostración de que o traballo científico permite avanzar cara a un futuro máis sustentable e afrontar problemas reais que nos afectan a todos” -apuntou a investigadora-.

Así mesmo, tamén se entregaron diferentes accésits en todas as categorias.