A UVigo homenaxea nun acto multitudinario o esforzo e talento do alumnado cos mellores expedientes de acceso á universidade

Preto de 700 estudantes do total de 949 que na fase xeral da PAU acadaron unha nota igual ou superior a 8,5 recibiron este venres a homenaxe do Sistema Universitario Galego, na Megau 2025, un acto organizado pola UVigo, xunto ás universidades de Santiago de Compostela e A Coruña e a Consellería de Educación, Ciencia, Universidades e FP. No pavillón vigués de As Travesas, unhas 2000 persoas déronse cita nun evento que recoñeceu o traballo e talento do alumnado cos mellores expedientes de Galicia de acceso á universidade, que cursou os seus estudos en 214 centros localizados nas catro provincias, aos que representaron 160 titoras e titoras, que tamén viron hoxe recoñecido o seu labor.

No acto, que foi conducido por Jéssica e Robinson, os protagonistas da canle da UVigo en TikTok, @uvigoshow, xunto con Oli, a mascota da institución académica viguesa, o reitor e o alcalde de Vigo; o conselleiro de Educación e os reitores de UDC e USC coincidiron en sinalar ás e aos premiados como o futuro de Galicia, ao tempo que gabaron o seu esforzo, así como o das súas familias e docentes. As vicerreitoras de Estudantado e Empregabilidade da UVigo, Natalia Caparrini, e da UDC, María José Lombardía, respectivamente; e a de Titulacións e Internacionalización da USC, María José López; o presidente do Consello Social da UVigo, Ernesto Pedrosa, ocuparon o escenario do pavillón de As Travesas ao que subiron, baixo as directrices do delegado do reitor da UVigo na Comisión Interuniversitaria de Galicia (CIUG), Iván Area, os e as galardoadas e os e as súas titoras a recoller os seus recoñecementos.

A Coruña con 465 estudantes é, seguida de Pontevedra con 293, a provincia que se sitúa á cabeza de Galicia en número de estudantes premiados na Megau deste ano. Pola súa banda, Lugo suma 98 e Ourense 93. 

Ingredientes para facer un mundo mellor

Na súa intervención como anfitrión este ano da Megau, o reitor da UVigo, Manuel Reigosa, comezou destacando o momento complicado por mor das guerras e xenocidios que vive o mundo, pero que se pode mellorar “con dous ingredientes necesarios, pero non suficientes que tedes vós: o talento e o esforzo”, dixo en referencia ás e aos premiados. Reigosa, que reivindicou o protagonismo do coñecemento como alicerce da sociedade, tamén reclamou o sentimento de orgullo por un Sistema Universitario Galego, “que produce resultados magníficos”. Neste sentido, reclamou o esforzo das e dos docentes que “logo dunha longa noite de pedra” fixeron posible a descentralización e creación de tres universidades e sete campus. 

Centrándose na UVigo, o seu reitor referiuse ao recoñecemento do talento e do esforzo, á docencia de excelencia e á relación coa sociedade, como os tres ingredientes que caracterizan á institución académica viguesa, que se suman ao seu carácter igualitario e inclusivo. Reigosa, que reiterou o seu desexo de que proximamente sexan reitoras as que dirixan as universidades galegas, rematou a súa intervención asegurando, en referencia ao estudantado homenaxeado que, “o futuro depende de vós”.

O cerebro de Galicia

Pola súa banda, os reitores da USC e da UDC coincidiron en sinalar a excelencia das e dos premiados, froito para Antonio López, “do esforzo e a dedicación, tanto persoal como individual de cada estudante, como das súas familias e dos centros. Un motivo de honra, sen dúbida, que nos obriga ás universidades a estar á altura para ofrecer o mellor servizo posible, achegándolle o acceso a unha educación da máxima calidade”. O reitor da USC, que defendeu a calidade do ensino universitario público galego, rematou lembrando, no 75 aniversario do seu pasamento, a idea que Castelao tiña sobre a universidade, á que se refería como “o cerebro de Galicia”.

O reitor da UDC, Ricardo Cao, destacou o papel da  universidade como “un lugar onde ademais de adquirir coñecementos, é un espazo de crecemento persoal, de pensamento crítico, de compromiso coa sociedade”. Neste sentido, subliñou o papel das tres universidades públicas galegas conformando un “sistema universitario sólido, diverso e comprometido co país, que colabora de maneira intensa e frutífera.” Para Cao, “Galicia necesita do voso talento, da vosa enerxía e da vosa visión para construír un futuro mellor”.

Moita luz e moito futuro para Galicia

O conselleiro de Educación, Ciencia, Universidades e FP, Román Rodríguez, gabou o traballo e o esforzo do alumnado premiado, que asegurou é “o orgullo da sociedade galega”, ao tempo que o animou a enfrontar con esforzo unha nova etapa académica . O conselleiro tamén aproveitou a súa intervención para felicitar o traballo do profesorado e para asegurar que “hai moita luz e moito futuro para Galicia”.

Pola súa banda, o alcalde de Vigo, animou ao alumnado premiado a presumir e sentir orgullo “do que sodes”, ao tempo que asegurou que a universidade “será a vosa casa e a vosa marca vital e profesional”. Abel Caballero rematou a súa intervención solicitando un recoñecemento para o profesorado e un grande aplauso para as familias do alumnado premiado.