Unhas xornadas somérxense no papel da auga na historia

A Facultade de Historia celebrou este xoves as xornadas A auga na historia. Nelas, diferentes especialistas abordaron o papel que xogaron os recursos hídricos ao longo do tempo e desde perspectivas diversas. A iniciativa estivo apoiada pola Vicerreitoría do campus de Ourense e en liña co Campus Auga, o proxecto de especialización deste campus acreditado e financiado pola Xunta de Galicia. 

A inauguración da cita contou coa participación de Julio Prada, decano da facultade organizadora, que explicou que cada ano o centro organiza unhas xornadas o último xoves de abril nas que aborda unha temática de xeito transversal, rachando os estancos dos períodos e etapas históricas ou xeografías. Nesta ocasión, detallou, a temática elixida foi a auga, en liña co Campus Auga, apuntando que aínda que o centro e os seus grupos de investigación non forman parte directamente deste proxecto de especialización si colaboran con el en diferentes iniciativas, como a celebrada este xoves. O responsable académico tamén agradeceu a implicación nesta xornada das áreas de Arqueoloxía, Historia de América e Análise Xeográfica Rexional da UVigo, que participaron na súa organización. 

A programación arrancou cunha conferencia sobre o ciclo urbano da auga na Hispania romana, a cargo de Nuria Romaní, da Universidad Autónoma de Barcelona. Seguiulle unha intervención de Carmen Pérez, do Centro de Investigación e Ecomuseo La Ponte, sobre o manexo da auga nas culturas prehispánicas de América do Sur. Para rematar a xornada, Ángel Rodríguez, da Universidade da Coruña, falou dos usos lúdicos da auga.