Campaña de comunicación 2021

Vivo UVigo

UVigo - Comunicación 19/05/2021

Logo de tomar nun tempo récord medidas para garantir a continuidade da actividade docente en plena pandemia, a Universidade de Vigo encarou o curso 2020/2021 cunha aposta firme pola presencialidade e pola protección da saúde dos seus membros. Isto foi posible redeseñando os seus espazos de aprendizaxe e fortalecendo as súas ferramentas de teledocencia.

A Universidade de Vigo presenta agora a súa nova campaña de comunicación 2021, deseñada e realizada por persoal da institución académica e na que o noso estudantado volve ser o protagonista.

Co slogan “Vivo UVigo”, as tres pezas da campaña amosan unha universidade viva que convida o seu estudantado a valorar e a gozar dos pequenos momentos imprescindibles para fortalecer a experiencia universitaria na casa, no deporte ou nos propios campus.