Día Mundial sen Tabaco 2021

O Día Mundial Sen Tabaco celébrase en todo o mundo cada 31 de maio. Deste xeito búscase, por unha banda, informar o público sobre os perigos que supón o consumo de tabaco, sobre as prácticas comerciais das compañías tabaqueiras, sobre as actividades realizadas para loitar contra a epidemia do tabaquismo e, por outra, lembrarlles a todas as persoas o que poden facer para reivindicar o seu dereito á saúde e a unha vida sa.

O tabaquismo é o primeiro motivo illado de mortalidade e de morbilidade evitable. Causa o 90 % das mortes por cancro del pulmón, o 95 % das mortes por enfermidade pulmonar obstrutiva crónica, o 50 % da mortalidade cardiovascular e o 30 % das producidas por calquera tipo de cancro. Non só supón un dano na saúde do fumador ou fumadora, senón que tamén e prexudicial para todas aquelas persoas que inhalan o seu fumo nocivo. 

O 90 % do estudantado de ensinanzas secundarias segue percibindo esta droga de «prohibido acceso a menores» como de fácil acceso e sen ningunha dificultade para chegar a conseguila. Segundo o Programa de Enquisas sobre Alcohol e outras Drogas en España (EDADES 2019/2020), o tabaco é unha das drogas que se empeza a consumir a idades máis temperás (entre os 16,6 e os 16,7 anos de idade). Diversos estudos afirman que as persoas mozas que non comezaron a fumar na adolescencia dificilmente chegan a ser fumadoras na vida adulta. Isto pon de manifesto a necesidade de mellorar as estratexias de prevención actuais, entendidas como todas as actividades, as actuacións ou os servizos que teñen como finalidade reducir tanto a oferta de drogas como a súa demanda.

Desde a Área Responsabilidade e Cooperación Social, facendo referencia á importancia do ODS 3 «Saúde e benestar», queremos trasladarlle a toda a comunidade universitaria a importancia das medidas dirixidas a previr o consumo de tabaco, a limitar a súa oferta e a regular a súa publicidade, promoción e patrocinio, para finalmente acabar con esta pandemia que causa 8 millóns de mortes cada ano. Ademais animamos a todas as persoas fumadoras a deixar o tabaco uníndonos á campaña da Rede de Universidades Saúdables deste ano que leva por título: «Comprométete a deixalo. Atrévete a romper co tabaco».