Vicerrectorado de Investigación

Licenciado en Física pola Universidade de Santiago de Compostela, incorporouse á Universidade de Vigo en 1995, onde desenvolveu toda a súa carreira académica. É catedrático no Departamento de Física Aplicada e na actualidade coordina o grupo de investigación FA2.

Ao longo da súa traxectoria impartiu docencia en distintas titulacións das ciencias experimentais e da enxeñaría, así como en programas de mestrado e doutoramento, o que lle permitiu adquirir unha visión ampla do ámbito universitario e establecer numerosas colaboracións.

A súa actividade investigadora céntrase na física de fluídos complexos e, máis recentemente, na simulación molecular computacional de materiais para a captura e almacenamento de gases como o dióxido de carbono ou o hidróxeno. Grazas a esta actividade participou en proxectos financiados, dirección de teses doutorais, publicacións en revistas internacionais e unha intensa actividade internacional con estadías en diversos países.

No ámbito da xestión universitaria desempeñou diferentes responsabilidades, entre elas secretario da Facultade de Química, director de departamento e coordinador de programas de doutoramento. Ademais, participa activamente na Real Sociedade Española de Física, onde preside o Grupo Especializado de Termodinámica e a Sección de Galicia.

• O deseño e implantación de políticas que fomenten a investigación de excelencia.
• A promoción, planificación, avaliación e recoñecemento das actividades de investigación en todos os ámbitos da Universidade de Vigo.
• As relativas á biblioteca universitaria e ao Servizo de Publicacións.
• As correspondentes aos grupos de investigación, institutos universitarios e centros de investigación, en coordinación coa Vicerreitoría de Transferencia, Innovación e Impacto Social.
• As relacionadas coa participación da universidade nas convocatorias externas de axudas á investigación.
• A proposta, formalización e seguimento institucional dos proxectos de investigación de ámbito autonómico, estatal e internacional.
• As correspondentes á Oficina de Proxectos Internacionais e ás relacións institucionais con organismos, redes e centros de I+D no ámbito das competencias delegadas.
• A planificación, coordinación e execución das políticas e actuacións vinculadas ao Campus do Mar, así como a coordinación coas respectivas vicerreitorías de campus para o desenvolvemento e a coherencia das políticas de investigación nos campus de especialización Auga e Crea.
• As relacionadas coas redes universitarias e científicas internacionais vinculadas ás competencias obxecto de delegación.
• As referidas á convocatoria de axudas propias no ámbito das competencias delegadas nos puntos anteriores e aos seus procedementos derivados.
• A supervisión e o apoio ao desenvolvemento, seguimento, modificación e certificación dos procedementos de aseguramento da calidade da investigación.