Alén Space, 'Premio Cinco Días a la acción empresarial más innovadora ligada a la universidad'

A spin-off da Universidade de Vigo Alén Space gañou o Premio a la acción empresarial más innovadora ligada a la universidad que outorga o xornal Cinco Días, decano da prensa económica española. Na súa decimo segunda edición, o xurado dos Premios Cinco Días a la innovación empresarial acordou outorgar a Alén Space o galardón que recoñece o mellor proxecto empresarial innovador desenvolvido a través da colaboración entre a universidade e a empresa. “Gañar este premio, ademais dun recoñecemento ao gran traballo realizado ata a data polo noso equipo, e dun caso paradigmático de éxito na relación empresa-universidade, supón unha grande oportunidade para aumentar o coñecemento das enormes posibilidades que os pequenos satélites ofrecen”, sinala Guillermo Lamelas, director executivo de Alén Space.

Ademais das características claves da empresa centrada no desenvolvemento e fabricación de nanosatélites, como a tecnoloxía, o equipo humano, o potencial de mercado ou posicionamento, Lamelas considera que na decisión do xurado do premio foi clave “o proceso de rexeneración e transferencia de tecnoloxía desde a Universidade de Vigo a Alén Space e a continua colaboración entre ambas entidades”. Unha relación que o director executivo da spin-off considera fundamental para asegurar que a investigación que se se realiza na universidade sexa quen de impactar e mellorar a vida da xente. “Trátase dunha relación positiva que debe realimentarse continuamente”, afirma Lamelas.

Os nanosatélites Xatcobeo, Humsat-D, Serpens e Lume-1 son os exemplos máis salientables da colaboración que ao longo de mais dunha década mantiveron a Universidade de Vigo e Alén Space, agora xa legalmente constituída como unha spin-off da institución académica viguesa.

Premiados, referentes nos seus sectores

A Basque Culinary Center, desenvolvida en colaboración coa Universidad de Mondragón; a spin-off New Food Development da Universidade de Zaragoza; Torusware, spin-off da Universidade de A Coruña ou Emite Ingeniería SL da Universidad Politécnica de Cartagena, son algunhas das empresas que acadaron o Premio a la acción empresarial más innovadora ligada a la universidad en edicións anteriores dos galardóns convocados por Cinco Días. “Xa van unha ducia de edicións deste premio e as empresas galardoadas en anteriores edicións son verdadeiros referentes nos seus sectores. Poder ser parte deste grupo é un tremendo orgullo”, asegura Guillermo Lamelas. 

Desde a súa constitución, o director executivo de Alén Space destaca que fixaron dous obxectivos clave para as súas primeiras fases, “a procura de clientes e a procura de socios para acompañar o crecemento da empresa. E niso estamos, enfrascados. O traballo realizado a nivel comercial está a empezar a dar os seus froitos, moito antes do previsto e como resultado contamos xa cos nosos primeiros ingresos por ventas e cun prometedor funnel de potenciais clientes”, destaca Lamelas.

Alén Space e os galardoados nas outras dúas categorías dos premios Cinco Días a la innovación empresarial 2019 recibirán unha obra da artista Cristina Iglesias conmemorativa dos premios.