Diario da Universidade de Vigo
Os xogadores lideran o seu grupo na primeira división
O equipo de baloncesto masculino suma a súa quinta vitoria consecutiva
O sábado 65 persoas participaron na segunda ruta cultural do curso
Imaxe de arquivo do equipo de baloncesto masculino
Foto de grupo das e dos participantes no roteiro polo Camiño Miñoto
A categoría masculina do Universitario Campus Ourense de baloncesto continúa sen estrear o marcador de derrotas, sumando esta fin de semana a súa quinta vitoria consecutiva. Pola contra, a categoría feminina segue sen estrear o marcador de vitorias. Tamén esta fin de semana xogaron encontros de liga os equipos de rugby e fútbol gaélico do campus, ademais de celebrarse a segunda ruta cultural deste curso académico, na que participaron 65 persoas.
O sábado, o Universitario Campus Ourense de baloncesto sénior masculino recibiu nas instalacións universitarias a CB Tui Seta, ao que gañou por un marcador de 70-40. Con cinco vitorias nos cinco partidos disputados, os xogadores sitúanse líderes de grupo na primeira división masculina. Xa na primeira división autonómica feminina, o representante do campus perdeu o domingo por un marcador de 75-51 na súa visita a Fisiogal Centro de Fisioterapia. Con cinco derrotas en cinco partidos disputados, as xogadoras mantéñense no último posto do seu grupo.
Rugby e fútbol gaélico
Co primeiro equipo de descanso, esta fin de semana xogaron encontros da liga galega de rugby as categorías masculina e feminina do Campus Universitario Ourense Rugby. A masculina gañou a Santiago RC 17-22 e a feminina perdeu ante o Kaleido Universidade Vigo por 41-27. Polo que respecta ao fútbol gaélico, o domingo as instalacións deportivas universitarias acolleron o encontro da Liga Galega de Fútbol Gaélico entre o combinado do Auriense Campus da Auga FG e o Keltoi Vigo GAC, tanto na categoría masculina como feminina. Ao seu remate celebrouse a IV Xornada da Liga Gallaecia-Conferencia Sur, na que se enfrontaron Afiadoras FG contra Gróvias FG e Condado FG contra Morrazo Berobreo FG.
Segunda ruta do curso
Tamén este sábado, a Área de Benestar, Saúde e Deporte da Universidade de Vigo celebrou a segunda ruta cultural deste curso académico. 65 persoas procedentes dos tres campus realizaron a andaina Camiño da Geira Miñoto Ribeiro, podendo no percorrido gozar “do outono en estado puro”. Cunha dificultade baixa-media e 16 quilómetros de percorrido, a andaina levou ás e aos participantes ao Museo do Viño de Galicia, en Ribadavia; ao balneario de Berán; á ermida de San Roque; a Lebosende; a Pazos de Arenteiro e á Adega Señorío de Beade.