Máster Universitario en Biodiversidade Terrestre: Caracterización, Conservación e Xestión
Características
O Mestrado interuniversitario en biodiversidade terrestre: caracterización, conservación e xestión impártese nas universidades de Santiago de Compostela, Vigo e A Coruña e proporciónalle ao alumnado unha formación avanzada e especializada nestes estudos. O obxectivo é formar profesionais para empresas de consultoría ambiental, empresas ambientais e administracións e mellorar os coñecementos das persoas profesionais xa dedicadas a esta actividade. Ademais fórmanse novas persoas investigadoras para incorporar en equipos de investigación de centros públicos e empresas relacionados coa caracterización, a conservación e a xestión da biodiversidade terrestre.
Acceso e admisión
Se o número de estudantes con interese en realizar o mestrado é superior ao límite de prazas establecido, realizarase unha selección en función dos seguintes criterios:
- Daráselle preferencia ao estudantado dos graos en Bioloxía, ordenados por expediente académico.
- O alumnado das titulacións de Ciencias Ambientais, Enxeñaría Forestal e do Medio Natural e Enxeñaría Agrícola e Agroalimentaria seguirá sendo ordenado por expediente académico.
- Finalmente, o estudantado das licenciaturas en Farmacia, Química, Veterinaria e Ciencias Mariñas (así como doutras licenciaturas de ciencias, se así o decide a comisión académica interuniversitaria), ordenado por expediente académico.
Plan de estudos
O mestrado ten un enfoque fundamentalmente práctico, co obxectivo de dotar o alumnado de todas as ferramentas que poida necesitar no futuro. Esta perspectiva é nova dentro do sistema universitario español porque, ata a data, ningún outro programa de grao comparte este enfoque.