Máster Universitario en Ciberseguridade
Características
O Mestrado interuniversitario en ciberseguridade da Universidade de Vigo e da Universidade da Coruña é un programa de estudos especializado que ofrece unha formación profesional rigorosa e integral neste campo, dende os fundamentos ás aplicacións, dende os mecanismos á lexislación e dende os conceptos aos problemas empresariais reais.
O programa de formación consta de 90 créditos ECTS, divididos en tres semestres; un primeiro de materias técnicas e un último semestre dedicado a aspectos xurídicos e de xestión, prácticas en empresas e o traballo de fin de mestrado (TFM).
Acceso e admisión
Os criterios específicos de admisión para o mestrado serán, por orde de prioridade:
- As cualificacións de acceso das persoas solicitantes.
- O expediente académico
- Outros méritos relacionados co campo da ciberseguridade.
Daráselles preferencia ás persoas con titulacións relacionadas coas tecnoloxías da información e da comunicación, seguidas das tituladas en disciplinas científicas básicas (Matemáticas, Física ou campos relacionados), e estas terán prioridade sobre calquera outra cualificación académica. A experiencia profesional previa no campo da ciberseguridade será considerada pola comisión académica do mestrado como un criterio adicional para as decisións de admisión, así como, se se considera necesario, entrevistas persoais coas persoas solicitantes para avaliar adecuadamente a súa aptitude e motivación.
Os criterios de admisión basearanse nos seguintes aspectos:
- A idoneidade da titulación para o acceso aos contidos do programa de mestrado, cunha ponderación do 60 %.
- O expediente académico, cunha ponderación do 30 %.
- Outros méritos relacionados co ámbito da ciberseguridade (experiencia laboral, formación extracurricular, participación en actividades relacionadas etc.), cunha ponderación do 10 %.
Perfil de ingreso recomendado
O perfil recomendado é o de titulado/a nun grao ou mestrado de temática directamente relacionada coas tecnoloxías da información e as comunicacións, preferentemente un mestrado ou grao en enxeñaría informática ou en enxeñaría de telecomunicación. A titulación facilita a incorporación tanto de novos graduados/as como de profesionais do sector con experiencia que desexen focalizar a súa carreira profesional en ciberseguridade. Neste último caso, facilítase a matrícula a tempo parcial para permitir compatibilizar os estudos coa vida laboral.
Obxectivos xerais da titulación
A misión deste mestrado é formar persoas profesionais altamente cualificadas en todos os procesos técnicos, organizativos, operativos e forenses relacionados coa seguridade dixital. A institución (ISC) estima que nos vindeiros anos haberá máis de 1,5 millóns de postos de especialista neste campo que quedarán sen cubrir. Esta é a realidade actual que está a transformar o panorama profesional e este mestrado permite que tanto as persoas tituladas recentes no campo das TIC como as profesionais con experiencia se especialicen nesta área.
Plan de estudos
Saídas profesionais
Neste mestrado realízase unha formación avanzada, que permite desempeñar tarefas tanto en equipos de seguridade defensiva (Blue Team) como nos de seguridade ofensiva (Red Team).
Trátanse tamén aspectos xurídicos e de xestión no ámbito da ciberseguridade que complementan os coñecementos do estudantado. A docencia ten unha marcada orientación práctica, orientada á resolución de problemas en contornas aplicadas.
- Especialistas en deseño e implementación de sistemas de xestión de seguridade da información
- Especialistas en securización de redes e sistemas de telecomunicación
- Especialistas en deseño e implementación segura de aplicacións
- Especialistas en fortificación de sistemas (seguridade defensiva)
- Analistas de seguridade corporativa especializados en técnicas ofensiva
- Especialistas en seguridade IoT e IIoT
- Analistas de malware
- Analistas forenses
- Auditoría de seguridade