Máster Universitario en Dirección e Planificación do Turismo Interior e de Saúde - Semipresencial
Características
Nunha sociedade do coñecemento, o triángulo da intelixencia turística está composto ao unísono pola formación, a investigación e a innovación. O Mestrado universitario en dirección e planificación do turismo interior e de saúde oferta a formación e prepara para a investigación e a innovación.
A calidade do programa e do profesorado (académicos, investigadores e profesionais do sector turístico), o nivel de especialización e a capacidade que ofrece para realizar prácticas en empresas, unido a unha metodoloxía de ensino que prima o traballo en equipo e presenta a posibilidade de aprender mediante a análise e a resolución dos casos reais, e as experiencias e coñecementos que transmite o profesorado, fan que este mestrado se adapte ao mercado laboral e, por conseguinte, brinde posibilidades reais en termos laborais.
Acceso e admisión
O requisito principal é ter unha titulación universitaria (diplomatura, licenciatura ou grao) e reservarase o 80 % das prazas, tanto na modalidade presencial como semipresencial, para os titulados/as en Turismo.
En ambas as modalidades, na selección valórase:
- Expediente académico
- Experiencia profesional
- Estancias no estranxeiro
- Coñecemento de idiomas
- Outros méritos
Obxectivos xerais da titulación
- Formar o alumnado na xestión de organizacións turísticas, así como no deseño de novos produtos/paquetes turísticos ou na planificación de proxectos de desenvolvemento turístico, coa súa posterior aplicación e posta en marcha.
- Promover o contacto directo co sector turístico.
- Ofrecer unha visión integrada dos diferentes subsistemas que conforman o sistema de organización/empresa no sector turístico.
- Coñecer e comprender a evolución do turismo.
Plan de estudos
Saídas profesionais
A través deste mestrado o alumnado adquirirá coñecementos vinculados co turismo desde ámbitos como a xestión, planificación ou mercadotecnia ata temas máis específicos ligados á especialidade do mestrado, Turismo interior e Turismo de saúde. É por iso que o estudantado que finaliza esta titulación está preparado para traballar nos seguintes campos:
- Dirección de empresas e actividades turísticas (especialidade de Turismo interior e de saúde)
- Planificación e xestión de destinos turísticos en institucións públicas e privadas
- Planificación e xestión de proxectos de aproveitamento de recursos turísticos
- Formación e asesoramento no campo turístico
- Emprendemento de actividades turísticas
- Investigación de mercados turísticos