Máster Universitario en Visión por Computador
Características
Este mestrado ofrece unha especialización interdisciplinar en todos os fundamentos da visión por computador. Foi deseñado sobre a base da experiencia de investigación e transferencia de coñecemento de catro universidades de Galicia e do norte de Portugal. A visión por computador ten como obxectivo comprender escenas a partir de imaxes e vídeos mediante o uso de ordenadores. É un dos campos de investigación máis prolíficos en intelixencia artificial e o estado actual da arte está a impulsar a innovación nunha ampla gama de aplicacións do mundo real.
Acceso e admisión
- Graos universitarios en calquera área de ciencias, enxeñaría e enxeñaría técnica.
- Adecuación do expediente académico e do currículo ao perfil académico esperado.
- Acreditación dun nivel mínimo de inglés B1.
- Contactar coa universidade elixida para máis información sobre as opcións dispoñibles para a acreditación do nivel de inglés.
Os criterios de selección basearanse nos seguintes aspectos:
- Expediente académico (80 %).
- Experiencia laboral no campo da visión por computador (preferiblemente) e das TIC en xeral (15 %).
- Outros méritos relacionados co campo da visión por computador (preferiblemente) e das TIC en xeral (5 %).
Perfil de ingreso recomendado
Este mestrado está dirixido a estudantes que teñan un grao en Matemáticas, Física ou Enxeñaría, e que teñan intereses diversos na tecnoloxía de visión por computador:
- Estudantes que busquen unha especialización antes de incorporarse ao mercado laboral.
- Estudantes que están a realizar unha tese de doutoramento neste campo.
- Emprendedores/as que buscan formación para crear as súas propias empresas neste eido.
- Profesionais que traballan en empresas tecnolóxicas e queren ampliar/complementar as súas competencias.
O perfil de admisión recomendado é:
- Formación matemática polo menos equivalente á que proporciona un grao en Enxeñaría.
- Habilidades de programación (C/C++, Java, Matlab, Python ou similares).
- Nivel de inglés equivalente ao nivel B2 do CEFR, aínda que só se require o nivel B1.
Plan de estudos
O programa de mestrado trata a necesidade de formar expertos/as cualificados nun campo que se está a converter en fundamental para manter o impulso innovador na automatización de tarefas que requiren cognición visual. Co crecemento exponencial do volume de imaxes e vídeos dixitais capturados por cámaras, a comprensión automática do noso mundo visual nunca foi tan importante.