A Biblioteca presenta as novas biblioguías para guiarte no universo da información

A biblioteca universitaria ten entre as súas funcións axudarlle á comunidade universitaria a localizar información científica de calidade para non perderse no universo da información.

Son moitos os recursos e as fontes de información aos que acudimos acotío para o noso traballo académico e científico. Mais, son todas as fontes fiables? Cales son os recursos máis interesantes para cada ámbito? Como me pode axudar a biblioteca?

Nas biblioguías atoparás guías de apoio á investigación, á docencia e á aprendizaxe, e todos os recursos de información subscritos pola biblioteca e outros de acceso aberto seleccionados polo persoal.

Estas guías están dirixidas ao estudantado, ao profesorado e ao persoal investigador, e organízanse en grupos:

• Guías temáticas: recollen recursos de información por ámbitos temáticos
• Guías de apoio á investigación: ofrecen información necesaria para acompañarte no proceso de investigación
• Guías de servizos: explican polo miúdo os servizos que presta a biblioteca
• Guías de recursos: para aprender a utilizar os recursos de información 
• Guías de apoio á aprendizaxe e á docencia: recomendacións para axudar ao alumnado na elaboración de traballos académicos
• Recursos electrónicos A-Z: a relación completa de recursos de información subscritos pola biblioteca, e unha selección doutros de interese

As biblioguías están en permanente actualización, para adaptalas ás novidades no mundo da información, que son continuas.