A Universidade de Vigo organiza entre os días 14 ao 16 de xuño o congreso EUNIS2023, a cita anual da European University Information Systems, a organización europea de sistemas de información universitarios. Baixo o lema Universidades europeas e a transformación dixital: retos e oportunidades por diante, ao longo de tres xornadas máis de 200 persoas chegadas de diferentes países europeos daranse cita en Vigo para debater sobre a xestión con tecnoloxías da información e achegar solucións no eido académico, docente e investigador.