A Universidade de Vigo é unha das cinco sedes do 5º Congreso Internacional da Asociación de Dereito de Familia e Sucesións, ADFAS, unha cita que este ano se prolonga desde o 11 de abril ata o día 26 e que se leva a cabo, de xeito presencial, en diferentes universidades de España e Portugal, entre elas Vigo, onde a temática central será a intervención do Estado na protección de familia, incluíndo temáticas como o divorcio exprés, as unións de feito, a xestación subrogada ou a protección da familia nas relacións laborais. A cita é este luns e martes, 17 e 18 de abril, no salón de graos da Facultade de Ciencias Xurídidas e do Traballo.

A conferencia inaugural, ás 10.00 horas, correrá  a cargo das dúas directoras do congreso, a avogada brasileira Regina Beatriz Tavares da Silva, presidenta da Asociación de Dereito da Familia e das Sucesións, ADFAS, e a profesora da Universidade de Vigo María José Bravo Bosch, presidenta da Comisión Española de Historia do Dereito de Familia e Sucesións da ADFAS, así como membro honorario desta asociación.