A sede da Vicerreitoría acolle o relatorio O mundo en viaxes, a cargo do escritor, investigador e profesor de español en Bangladesh Moncho Iglesias, que presentará neste acto o seu libro Tren, concibido durante unha estadía de dous anos en China.

A actividade enmárcase no ciclo de coloquios e libros O mundo desde aquí, que o Instituto Galego de Análise e Documentación Internacional (Igadi) promove neste mes de xuño na sede da Vicerreitoría co obxectivo de abrir un espazo de encontro para pensar o mundo desde Galicia, aproveitando temáticas variadas e a recente publicación de libros por parte de colaboradores e investigadores asociados ao Igadi.