A Facultade de Dereito do campus de Ourense acolle o curso Violencia de xénero, organizado en colaboración co Colexio da Avogacía de Ourense. Durante cinco sesións que se prolongarán ata o 20 de novembro desenvolverase un dilatado programa de intervencións no que especialistas de diferentes áreas afondarán nas actuacións propias da fase do xuízo oral e executorias no proceso penal; as funcións e actuacións do médico forense; a perspectiva de xénero no proceso penal; a actuación policial e da avogacía; a perspectiva socio-psicolóxica e vitimolóxica e os menores.