Dentro do programa Divulgando Ciencia Singular, o Centro de Investigacións Biomédicas da Universidade de Vigo (Cinbio) organiza nos meses de novembro e decembro varias actividades de balde nas cidades de Vigo e Ourense co obxectivo de achegar á sociedade o labor que se desenvolve nas súas intalacións. En Ourense, o venres 29 de novembro celebrarase no edificio Politécnico unha xornada de portas abertas na que se realizarán de 16.30 a 19.00 h diversas actividades relacionadas coa bioinformática e cos produtos bioactivos. Concretamente as actividades serán un taller titulado Biomoléculas activas no teu día a día, sobre prebióticos/antioxidantes e relacionado co eido da enxeñaría química, e outro chamado Intelixencia artificial no ámbito sanitario, a cargo do grupo de Sistemas Informáticos de Nova Xeración SING.